La raschun per survegnir schlet durant ir cun auto è l'organ d'equiliber. Quel sa chatta en l'ureglia interna e gida da s'orientar en il spazi. Sch’ins sesa en l'auto, annunzia la motorica dal corp al tscharvè: Fermada. Sche l'auto sa mova survegn l'organ d'equiliber l'annunzia: Moviment. Pia seser e moviment en il medem mument – qua na vegn il corp betg pli suenter cun elavurar las infurmaziuns. La reacziun: survegnir schlet, sturn e render.
Mesiras preventivas
Tgi che patescha da quest problem duai sche pussaivel gist ir sez cun auto. Quel che manischescha l'auto survegn numnadamain darar schlet. Sche quai na va betg, èsi impurtant da seser en il dretg lieu. Tgi ch’è sensibel sesa il meglier davant e guarda a dretg ora e betg or da la vart. Quai saja fitg impurtant, di Yves Brand, schefmedi da la sparta da culiez, nas ed ureglia dal Ospital chantunal dal Grischun a Cuira. En tutta cas betg leger u guardar sin il telefonin. Fixar in punct a l'orizont ed avrir la fanestra per laschar viaden aria frestga po era gidar. Per la ruta vala: Plitost prender l'autostrada che vias lateralas, per quai che lezzas han pli paucas sortas. Adina puspè far pausas per sa mover e prender aria frestga.
Meds encunter schlet
Tgi che vul sa gidar cun in med natiral po empruvar cun mastgar in toc schentsch (per tudestg Ingwer) ubain cun zutgerins da schentsch. Plinavant datti er globulis encunter schlet e schlogns spezials che san gidar. Tgi che sa ch'el è sensibel duess prender il schlogn gia avant la partenza. Quels n'èn dentant betg adattadas per la persuna che va cun l'auto perquai ch'els pon far stanchel. Ed en mintga cas adina avair in stgarnuz ubain ina cuppa en l'auto per il cas urgent.