Forsa che intgins geniturs enconuschan era quest sentiment curius dad ir cun uffants en tscherts museums. Cunzunt museums d’ina atmosfera seriusa, sco per exempel in museum d’art cun tut lur objects custaivels, pon far in zic respect als geniturs u las persunas ch’accumpognan ils uffants. Qua vala: Explorar cun ils egls enstagl cun ils mauns. E quai n'è betg adina uschè simpel, sco Nicole Seeberger, la directura administrativa dal museum d’art declera.
En tscherts museums pon ins explorar cun ils mauns e tar nus è quai cun ils egls – e quai ston ils uffants era emprender.
Empruvar da guardar mo cun ils egls è anc ina chaussa, dentant pon uffants era esser dad aut. E quai po forsa disturbar in u l’auter visitader. Perquai èsi central ch’ils uffants hajan in tschert respect envers ils objects dal museum ubain era envers l’autra glieud, uschia Nicole Seeberger.
L'animaziun dals uffants è central
Era Flurin Camenisch, pedagog dal museum da la natira, enconuscha la situaziun che uffants pon magari esser dad aut e che quai po lura caschunar tscherts conflicts cun auters visitaders e visitadras. Per el èsi impurtant ch’ils uffants sajan animà endretg durant la visita en il museum. Il museum na saja betg ina plazza da gieus.
In tat u ina tatta po era dar vinavant lur experientscha cun la natira. Quai dependa adina era da las persunas ch’accumpognan ils uffants.
Uffants èn fitg bainvegnids en ils museums
Ord perspectiva da la promoziun da la cultura saja quai central ch'ils museums avrian lur portas era per in public giuven ubain fitg giuven. Uffants e giuvenils èn il futur, uschia il manader da l'uffizi da cultura Ursin Widmer.
In viver cultural cun tut las purschidas, cunzunt per uffants, pussibiliteschan era ina tscherta identitad – è perquai è quai fitg impurtant.
