Ina da las finamiras per la strategia per la politica da drogas e dependenza da la citad da Cuira è la prevenziun. Per elavurar in plan cun mesiras da prevenziun, ha la citad incumbensà la fundaziun da sanadad svizra RADIX. Ensemen cun questa fundaziun è vegnì elavurà in plan sin basa dal uschenumnà process «Commiunities That Care». Quest process vegn era gia nizzegià dad autras vischnancas. Per pudair elavurar las mesiras è vegnì fatg ina retschertga tar la giuventetgna il 2022 – concret tar 660 giuvenils tranter 13 e 15 onns. Bun in quart dals dumandads e las dumandadas da Cuira han inditga ch'els hajan gia gì patratgs serius da suicidi – tar las giuvnas èsi perfin in terz da las dumandadas. Latiers hajan bun 10% inditgà da gia avair experimentà cun drogas diras.
Sin basa da questas evaluaziuns ed era tras discussiuns avertas cun la giuventetgna ha il parlament da Cuira elavurà in plan da mesiras per ils proxims onns. Tranter auter è vegnì constatà durant las discussiuns che blers giuvenils na hajan betg in lieu nua ch'els sa sentian acceptads u prendì serius e survegnian sustegn. Las mesiras duajan vegnir realisadas en ils secturs: famiglia, scola, conturn social e lieu d'abitar. Mesiras concretas èn tranter auter: dapli sustegn tras purschidas da cussegliaziun, integraziun per exempel tras uniuns u pussibilitads da pudair influenzar chaussas tras cussegls da classas en scola.
Il program da prevenziun cun las mesiras vegn sco proxim discutà dal parlament da Cuira. La realisaziun custass tranter 80'000 enfin 150'000 francs ad onn.
