La polizia da Cuira ha tschiffà laders en flagranti glindesdi marvegl las 02:30. Il tun da fanestras sfratgadas ha fatg attent in vischin. Quel ha observà duas persunas ed in chaun tar ina butia cun in esch da vaider rut ed alarmà la polizia. Quai scriva la Polizia chantunala.
![Fastitgs da l'emprova da rumper en presumabla a Cuira il glindesdi.](https://www.rtr.ch/static/cms/images/960w/69889d.jpg)
Duas patruglias da la polizia da Cuira ch'eran datiers han lura arrestà ils dus umens e surdà quels a la Polizia chantunala. La procura statala ha ordinà da tegnair en fermanza ils dus umens. Il chaun han ins surdà a la pensiun d'animals Arche Chur.