Che abitaziuns pajablas èn raras a Cuira – quai n'è nagut nov. Per cumbatter quella problematica, ha la partida socialdemocratica da Cuira lantschà danovamain ensemen cun l’associaziun da locataris e la societad per la construcziun da chasas ina iniziativa. E quella è vegnida inoltrada cun radund 1'780 suttascripziuns tar la citad.
L'iniziativa vul francar la finamira d'abitaziuns pajablas en la constituziun da la citad da Cuira. Concretamain duai la citad s'engaschar d'ina vart per la protecziun d'abitaziuns favuraivlas ch'èn gia avant maun e da l'autra vart procurar per in augment constant dal dumber d'abitaziuns che vegnan dadas a fit permanentamain tenor il princip dal tschains sin basa dals custs.
I dovra finalmain directivas politicas liantas per abitaziuns pajablas.
La situaziun è daventada pli critica
Gia avant nov onns aveva la partida socialdemocratica da Cuira inoltrà ina sumeglianta iniziativa ensemen cun l'associaziun da locataris e la societad da construcziun. Quella n'è dentant betg reussida – 86 vuschs avevan decidì a dischfavur da l'iniziativa. La citad da Cuira n'è dapi lura betg pli s’angascha da guardar per abitaziuns pajablas, di l’iniziant Lukas Horrer da l'associaziun da locataris.
Ils onns passads èn ils tschains da locaziun explodids, entant che las pajas n'èn betg vegnidas da tegnair pitg.
Il problem sajan las perscripziuns – l'iniziativa protia anc dapliras
In dals gronds possessurs da ed investurs en immobiglias a Cuira è Thomas Domenig Senior cun sia fatschenta d'immobiglias. 1'100 da las radund 21'000 abitaziuns a Cuira tutgan a sia firma. La gronda part è passa 30 onns veglia e custa en media 1'500 francs al mais per ina da 3,5 stanzas e 1'850 francs per ina abitaziun nova.
... lura na bajegiain nus oramai betg pli a Cuira e finì, uschè simpel è quai.
L'iniziativa purtass tenor el anc dapli perscripziuns. Quai avess lura per sia firma la consequenza ch'els chalassan da bajegiar a Cuira e s'engaschassan pli fitg ordaifer il chantun. Els hajan gia plirs projects ordaifer dal Grischun.
President da la citad pren per enconuschientscha
Il nov president da la citad, Hans Martin Meuli, prenda per enconuschientscha la critica tant dad ina sco da l'autra vart. La chaussa vegnia uss tractada en la regenza da la citad e lura saja da guardar tge schliaziuns ch'ins possia porscher per meglierar la situaziun or da vista da la populaziun.
El tegn pauc da l'iniziativa. Ils ultims onns dettia gia tants problems cun la lescha da construcziun, l'uffizi da construcziun e tut ensemen uschia ch'els hajan gia reducì lur engaschi per construir abitaziuns. Tenor Thomas Domenig Senior è tut sufflà si uschè ferm ch'i na giaja prest betg pli. Ils pretschs per terren sajan uschè auts ed en cumbinaziun cun ils custs da construcziun che sajan creschids na cuntaschian ins strusch pli ina rendita brutta da 2,5%. E quella saja il minimum ch'els dovrian.
