Il cussegl da la citad da Cuira ha decidì da betg mantegnair la centrala d'alarm ch'era vegnida chattada tar lavurs da construcziun per la nova sedia da l'interpresa Inventx. La rusna duai vegnir emplenida cun betun e betg pli esser accessibla. Sco che la citad da Cuira scriva en ina communicaziun, fissan ils custs per il mantegniment da la centrala – per exempel per guids u per eveniments – stads auts.
La valur dals rests da la centrala è fitg modesta, perquai avain nus decidì cunter la conservaziun.
Cun emplenir la rusna, possian en pli er vegnir segirads la via ed ils bajetgs vischins a lunga vista.
Scuvert in bunker tar lavurs da construcziun
Il Servetsch archeologic dal Grischun aveva constatà in arvieut da 20 sin 6 meters ch'era vegnì bajegià en il grip. La centrala d'alarm sutterrana ha pliras stanzas: Igl ha ina stanza da durmir, ina tualetta ed ina duscha ed ina stanza da lavurar e viver. In sistem per pumpar aria frestga cun pedalar sin velos è anc existenta.
La centrala d'alarm da la protecziun da l'aria è vegnida bajegiada il 1938 ed è stada en funcziun fin ils onns tschuncanta. La citad aveva classà ella sco «secreta», quai resulta d'in rapport da l'Uffizi da bajegiar da la citad da Cuira. En cas d'in bumbardament avess l'equipa da la protecziun da l'aria stuì ir sut terra, dar alarm a la populaziun e coordinar l'emprim agid suenter ina attatga.
Ina centrala d'alarm ch'è en in stan uschè bun è natiralmein speziala.
Per la tgira da monuments è la centrala degna da vegnir protegida.
Da principi è la centrala d'alarm betg protegida, perquai vulain nus chattar ina schliaziun cun ils responsabels.»
Co ch'i va enavant è uss en ils mauns da la citad da Cuira. Sche quella decidess da curclar la centrala, vuless il servetsch archeologic almain documentar la scuverta.
Or da l'archiv: Il Grischun sutteran
