Tenor la scola da la citad dettia in regress d'annunzias. Gia per l'onn da scola actual avessi atgnamain bastà d'avair be ina scolina rumantsch-tudestga per tut ils uffants. Cun quai che la situaziun n'è betg sa midada, hajan ins decidì da pigliar ensemen ils uffants en in lieu a partir da la stad proxima.
Serrar la scolina per adina n'è insumma betg noss intent, nus vegnin l'auter onn puspè ad analisar la situaziun.
A partir da l'onn da scola proxim vegnian ils uffants da la scolina rumantsch-tudestga ad esser en las localitads da la scolina Au. Il lieu tar il pavigliun Giacometti vegnia schlià. Las persunas pertutgadas sajan vegnidas infurmadas.
Tenor Ursina Patt, la directura da la scola Cuira vegnian ins l'auter onn puspè a guardar quants uffants ch'èn s'annunziads per la scolina bilingua e sch'igl ha avunda vegnia la segunda scolina puspè averta. I na saja insumma betg l'intent da serrar la segunda scolina per adina. Tar radund 20 uffants resti dentant tar in lieu, quai è il dumber maximal ch'il chantun dat avant per ina scolina.
Pauca chapientscha tar uniun rumantscha
Nagina chapientscha per questa decisiun ha l'Uniun rumantscha Cuira. Quella uniun s'engascha per la promoziun dal rumantsch da purschidas en la chapitala. Ils davos 12 onns hajan ins adina gì var 18 fin 29 uffants mintg'onn. Er uss sajan ins cun var 20 uffants avunda – sche era plitost sin in cunfin sut.
La decisiun saja be crudada ord motivs finanzials, scriva l'uniun. La scolina bilingua saja dentant er impurtanta per mantegnair las scolas bilinguas. Era la promoziun da la lingua saja impurtanta per la chapitala d'in chantun biling.
Per nus è quai in schlet signal da la citad da Cuira. Per nus è ina scola ferma la basa per ina scola bilingua ed insumma da la furmaziun rumantscha a Cuira.
L'uniun veglia agir e tschertgar il contact cun la scola da la citad da Cuira. Plinavant veglian ins far attent a la purschida.
Or da l'archiv
Il 2010 ha la Lia Rumantscha decis da serrar la scolina rumantsch, e la suprastanza da Cuira na vuleva betg introducir ina scolina bilingua. Il parlament ha dentant decis da tuttina far quai. A partir dal 2017 ha il chantun dà sustegn.