Il cussegl da citad da Cuira ha dà la lubientscha da stgarpar giu l'edifizi. Quai ha la chanzlia da la citad communitgà. Pli paucas visitadras e visitaders, sco er ch'ins avess stuì sanar l'edifizi eran intginas da las raschuns. La dumonda da spazzar era gia vegnida enconuschenta l'avrigl.
Suenter la dumonda da spazzar hai er dà critica
Or da vista urbanistica e culturala saja quai donn, ins prendia al quartier identitad ed istorgia, di Ludmilla Seifert da l'organisaziun Protecziun da la patria dal Grischun. La Kino Chur SA ha declerà ses motivs en ina communicaziun da medias.
Dispitaivel sch'igl è da proteger l'edifizi
La citad da Curia ed in gremi d'expertas n'eran betg perina, sch'igl è da proteger l'edifizi. Il gremi ha mess el sin ina glista d'edifizis degns da vegnir protegids, la citad Cuira ha dentant puspè stritgà il bajetg da questa glista.
La manadra da la Protecziun da la patria Ludmilla Seifert crititgescha era la tenuta da stgarpar giu edifizis en general. Quella ravgia da stgarpar giu saja dispitaivla en connex cun la stgaudada dal clima. Per bajegiar a moda persistenta saja da bajegiar cun las chaussas ch'èn gia avant maun.
Il kino Apollo è vegnì avert l'onn 1956. Sper il kinocenter dasper l'edifizi dal Cussegl grond, è l'Apollo il segund kino a Cuira che vegn manà da la societad Kino Chur SA.