L'onn 2022 han 1'572 persunas retschavì agid social a Cuira, quai munta a 2,7% da la populaziun. Las persunas vegnan sustegnidas en 638 cas socials, quai èn 8,6% pli pauc che l'onn avant. Quai scriva l'Iniziativa da las citads per la politica sociala en il rapport annual. En tut las 14 citads resguardadas munta la digren da cas socials a 2,6%.
Tenor las cifras da la citad da Cuira han cunzunt fugitivas e fugitivs ina gronda cumpart da cas socials. Da tut las persunas che dovran agid social sajan 35% persunas fugidas. Da tut la populaziun da Cuira èn 2,2% persunas fugidas, la quota da fugitivs e fugitivas en l'entir chantun è 1,1%. A Cuira abitian la mesadad da las persunas cun origin da fugia e chargian uschia il sistem social.
«Working poor» è gronda sfida
Per ils auturs da la retschertga è la cumpart da persunas che lavuran, ma dovran tuttina agid social ina gronda sfida. La cumpart dals uschenumnads «working poor», è creschida ils ultims onns. A Cuira ha bun la mesadad da las persunas che dovran agid social ina lavur, ma quella na tanscha betg.
Fitg periclitads da daventar cas socials èn persunas ch'educheschan sulettas. Per megliurar quai fa la citad da Cuira stentas per sustegnair la tgira d'uffants.
