I duai dar pli paucs obstachels per persunas che vulan s'engaschar en la Baselgia chantunala dal Grischun, di Reto Loepfe ch'è president da la cumissiun preparatorica.
Las midadas
Uschia duai per exempel esser pussibel da lavurar enfin 40% el secretariat d'ina plaiv e medemamain esser part da la suprastanza da la plaiv. Plinavant dastgan persunas giuvnas votar tar chaussas che pertutgan la baselgia chantunala gia davent da 16 e na betg pir davent da 18 onns.
Novs terms
Plinavant duai tut consequentamain vegnir scrit en las trais linguas chantunalas e differents terms duain vegnir midads: Il «Corpus catholicum» duai da nov avair num «cumissiun administrativa» e vegnir cumplettads culs terms «parlament da la baselgia chantunala» sco er «suprastanza da la baselgia chantunala». Quellas ed anc autras midadas porta la revisiun totala da la constituziun da la Baselgia catolica dal Grischun.
Il davos pled ha dentant il pievel catolic-roman che vegn a votar davart ella en l’emprima mesadad da l'onn 2024. Sch'ella vegn acceptada va ella en vigur davent da l'entschatta da l'onn 2025.