«Forschung II» è il num dal nov edifizi che celebrescha quest mardi l'avertura. L'edifizi vala sco pass central per il svilup dal campus medicinal ch'i dat dapi il 2019 sin l'areal da la clinica ault'alpina a Tavau.
Sco il num lascha lignar, sa focussescha la lavur en quest nov edifizi cumplettamain sin la prescrutaziun. Ils perscrutaders e las perscrutadras hajan la clera finamira da tschertgar schliaziuns per las differentas malsognas dals pazients e las pazientas, declara il directur scientfic Thomas Bieber. Impurtant saja ina buna preparaziun avant mintga experiment. Experiments sajan numnadaman chers, di Bieber. Ina buna collavuraziun e preparaziun sajan perquai centrala per ch'in project da perscrutaziun saja effizienta e rentabel.
A la tschertga da schliaziuns per pazients
Las lavurs da perscrutaziun dal nov edifizi metta il focus sin allergias sco era malsognas dal cor e da la circulaziun dal sang. La finamira saja da chattar schliaziuns persunalisadas per pazients e las pazientas – ed en il cas ideal schizunt chattar novs medicaments per persunas malsaunas. Actualmain sa fatschentan ils perscutrader e las perscutradras per exempel cun la malsogna neurodermitis, ina malsogna da la pel che saja tenor Thomas Bieber enorm cumplitgada. La finamira saja da chattar furmas da terapia che lubeschan als pazients e las pazientas da viver in lung temp senza simptoms.
Fatg pussaivel quest entir campus medicinal ha la fundaziun Kühne dal miliardar e philantrop Klaus-Michael Kühne. Sper programs da medischina da la fundaziun Kühne, duai l'infrastructura dal nov edifizi era porscher spazi per projects da perscrutaziun d'interpresas medicinalas da l'entir Grischun. Il chantun ha sustegnì la realisaziun dal nov edifzi cun 3,2 milliuns francs.