Pervia da las fermas malauras han ins savens il sentiment ch'i plova dapli che auters onns. Quai n'è betg uschia. La gronda differenza è che las fasas da plievgia e bell'aura èn pli lungas e na varieschan uschè savens sco pli baud. Qua tras plovi dapli en ina giada ed i po dar inundaziuns, uschia il climatolog Jan Sedlacek envers RTR.
Entant che la temperatura da la terra sa stgauda, datti er vinavant malauras.
Las malauras da questa stad n'èn però betg in cas unic. En avegnir sa ston ins adina pli savens far quint cun eveniments d'aura extrems: Plievgia, granella ma era blera naiv u undas da chalur.