La mancanza d'energia era cunzunt l'enviern passà in grond tema e quai era en la vischnanca da Claustra. La suprastanza aveva gronda tema da vegnir ellas stretgas ed avevan schizunt quintà da tut tenor stuair serrar las pendicularas pervia da la mancanza d'electricitad. Tenor Hansueli Roth, president da la vischnanca da Claustra haja quai dà il stausch da vulair far insatge.
«Nus vulain gidar ad augmentar il provediment d'electricitad. Il Solarexpress è pia stà per nus ina buna chaussa da trair si in tal project.» L'indriz da solar Madrisasolar el territori da Züg duai vegnir construids sur il vitg da Claustra sin radund 2000 meters sur mar. Il lieu è tenor la vischnanca optimal pervia da la infrastructura existenta cun in'alp e pendicularas.
Electricitad per las pendicularas
Roth manegia, ch'er las pendicularas pudessan profitar da l'ovra. Ellas pudessan retrair l'electricitad directamain da l'implant. Il rest va directamain en la rait. Tut en tut duai l'indriz producir electricitad per radund 4’000 chasadas. Per cumparegliar: A Scuol è planisà in'ovra che producescha electricitad per radund 12'000 chasadas.
L'energia da Madrisasolar vegn da 30'000 moduls da solar che duain vegnir construi sin ina surfatscha da ca. 150'000 meters quadrat. Uschè grond sco 21 plazzas da ballape. Ina gronda surfatscha che pertutgia la societad d'alp Albeina nua che Niklaus Zimmermann ei chau d'alp. El fa oravant tut quità per la natira.
Igl è ina intervenziun giganta en la natira si là. Quai dat schon da patratgar.
Atgnamain quitta el l'idea buna da producir electricitad nettia. El vesess penels da solar dentond pli gugent sin chasas schon existentas.
La vischnanca vesa quai in pau auter. Speras è numnadamain las pendicularas cun lur pistas da skis, gastronomia ed indriz da far naiv artifiziala. Uschia na saja quai betg in territori cun natira intacta. La finala sappia er la vischnanca profitar finanzialmain da quai. Els mettessan a disposiziun il terren al la Repower e lez dessan ina indemnisaziun a la vischnanca. Vinavant veglia la vischnanca exnum il dretg da tschantschar cun e decider tge che schabegia el futur cun quai indriz da solar e quai cun ina participaziun da 34%. 66% tutga al la Repower.
