Las bleras scolaras e scolars guardan enavos cun plaschair sin l'onn da scola passà. La magistraglia haja prendì temp per els. La relaziun cun il magister saja pli ferm «sin autezza dals egls», i dettia viadis e discussiuns, ed er ch'i dettia pli paucas lezias da chasa co en Ucraina haja plaschì.
En l'instrucziun han las scolaras e scolars tematisà sumegliants temas sco er las classas grischunas. In grond focus hajan ins dentant mess sin la lingua. Savair bain la lingua saja la basa per sa pudair integrar, dentant surtut er per avair success sch'i vulan far in emprendissadi ubain il gimnasi.
Sco emprim giaudan ils giuvenils las vacanzas. Intgins dad els visitan l'Ucraina, auters quintan dad emprender vinavant tudestg, e tuts vulan durant las vacanzas «ir a spass». Cun quai manegian ellas ed els surtut da s'inscuntrar e far insatge ensemen.
Dumondas avertas davart l'avegnir
Suenter las vacanzas da stad vai per blers dad els vinavant en la scola da Cuira. Els vegnan en il terz stgalim aut ubain ch'i fan il 10avel onn da scola. Cun quel vai surtut per filar vinavant vid il tudestg.
Ina dumonda che fatschenta tenor il magister, Samuel Niggli, fermamain las scolaras e scolars, è co ch'i va vinavant a lunga vista. Intgins scolars sajan gia turnads en l'Ucraina, auters stettian anc davant quella decisiun. I dettia er scolars che frequentan parallel cun la scola en Svizra ina scolaziun online en l'Ucraina. La decisiun na saja insumma betg simpla, uschia Samuel Niggli.