L'ospital chantunal a Cuira stat vinavant sut squitsch pervia da las bassas tariffas e la chareschia. L'onn passà è sa resultà in minus da prest 340’000 francs suenter amortisaziuns. Il 2023 aveva l'ospital anc fatg in gudogn da 2,6 milliuns francs.
Quai malgrà che la svieuta è creschida per passa 5% sin 543 milliuns francs, sco quai che l'ospital communitgescha. Tuttina restia il resultat da l'interpresa suenter amortisaziuns negativ. Tut en tut ha l'ospital tractà dapli pazientas e pazients. Tar il tractament staziunar è il dumber creschì sin passa 25’000. Pervia da las tariffas «bler memia bassas» na vegnian ins però betg da cuvrir ils custs, vegn cità il CEO da l'ospital chantunal, Hugo Keune.
Sut questas cundiziuns difficilas essan nus cnap cuntents cun il resultat.
Per l'ospital chantunal è l'integraziun da Samedan giud maisa
Quai han il president da la Fundaziun Ospital chantunal Grischun Martin Schmid ed era il CEO da l'ospital Hugo Keune ditg en il rom d’ina conferenza da medias ad RTR.
Cunquai che gia pliras vischnancas han votà Na, n'è quest plan da l’integraziun il mument betg pli tema per l'ospital a Cuira. Questa integraziun avess numnadamain duvrà il Gea da tut las 11 vischnancas da l’Engiadin’Ota. En l'avegnir è l'ospital chantunal dentant avert per ulteriuras propostas d'integraziun.
La balla saja ussa dentant tar l'ospital a Samedan ha ditg il president da la fundaziun dal spital chantunal, Martin Schmid.
Success medicinals e digitalisaziun
Er sche l’ospital chantunal haja scrit cifras cotschnas haja dà progress en il provediment medicinal ed en la digitalisaziun. Per exempel saja reussì da spindrar la staziun intensiva per uffants, quai grazia al sustegn da la populaziun. In ulteriur svilup impurtant saja stà la stabilisaziun dal Center da tumor sut la direcziun da prof. dr. Roger von Moos e da prof. dr. Richard Cathomas. Il center haja survegnì pliras certificaziuns renumadas che confermian la auta qualitad. Er en la digitalisaziun haja il KSGR fatg progress cun automatisar activitads manualas e cun introducir in nov portal per directivas da tgira. L'implementaziun da roboters da software mussia las stentas da tegnair pass cun innovaziuns tecnologicas e da reducir la chargia da lavur dal persunal.
Scolaziun ed infrastructura
Durant l’onn 2024 hajan 814 persunas fatg u l'emprendissadi, practicums e percurs da studi tar l'ospital chantunal. Er offrescha l’ospital novas professiuns d’emprendissadi per satisfar al basegn da persunal qualifitgà. Ultra da quai giaja il progress da construcziun da la part nova da l'edifizi tenor plan. L’avertura vegnia ad avair lieu avant la stagiun d’enviern 2026/2027.
