1'232 dischoccupads damain ha il Grischun dumbrà il zercladur, quai cumpareglià cun il mais avant. Las 2'388 persunas senza lavur correspundan ad ina quota da 2,2%. Quai tenor ina communicaziun da l'Uffizi per industria, mastergn e lavur. Ultra da quai èn vegnidas registradas 942 persunas che n'èn betg dischoccupadas, ma tschertgan ina lavur. Quai èn persunas che prenda part ad ina furmaziun supplementara u mesiras d'occupaziun.
Da cifras normalas èn ins tenor Paul Schwendener, manader da l'Uffizi per industria, mastergn e lavur, anc lunsch davent. «Avant in onn avain nus gì 800 dischoccupads – uss avain nus 2'300. En la branscha da turissem e gastronomia avain nus anc adina bunamain 1'000 dischoccupads. En auters onns sa mova la cifra en quai sectur enturn 300.»
1'129 dunnas e 1'259 umens
Il pli ferm pertutgada da dischoccupaziun è la glieud da la gastronomia cun 957, suandà dal commerzi en detagl 172, traffic e transport 172, industria da construcziun 150 e sanadad e servetsch social cun 125. Da las 2'388 persunas senza lavur eran 1'129 dunnas e 1'259 umens.
En l'entira Svizra datti 155'998 persunas senza lavur, la quota è tar 3,2%.
Lavur curta en Grischun
La lavur curta en il Grischun resta sin l'aut nivel dal matg, sco motiv principal vegn inditgà la la crisa da corona. Var 5'850 interpresas cun total 51'000 emploiads han introducì lavur curta. Cumpareglià cun il mais avant èn las cifras sa midadas be minimalmain.
Las cifras èn dentant da leger cun precauziun – ils manaschis han numnadamain temp trais mains da quintar giu la lavur curta, sco quai che Paul Schwendener explitgescha. Puncto lavur curta na possian ins perquai betg far explicaziuns. El quintia dentant che questa situaziun extraordinaria cuntinueschia. Uschia ha il chantun prendì a fit ulteriuras stanzas durant in onn per ils collavuraturs e las collavuraturas.
Confederaziun ha pajà pli pauc che quintà
Fin uss han pli paucas interpresas dumandà l'indemnisaziun da lavur curta che quintà. Tenor il Seco èn vegnidas pajadas ora l'avrigl radund 2,4 milliardas francs indemnisaziuns per lavur curta. Prognostitgà eran 5 fin 7 milliardas. Il mars ha la Confederaziun pajà en total indemnisaziuns en autezza dad 1 milliarda. L'avrigl eran tenor il Seco 1,08 milliuns persunas pertutgadas da lavur curta en 130'000 manaschis.
Ils mais matg e zercladur sajan las dumondas per lavur curta restadas sin medem nivel, numnadamain sin 195'000 manaschis.
