Igl è decidì: La pli bella fotografia è quella da Corsin Simeon. El gudogna cun quai in bon da 500 francs tar ina fatschenta da sport e vestgadira da chatscha. Plazza dus va a la foto da Walter Monn, cun la metoda da transport speziala. El survegn in bon da 300 francs. Plazza 3 va ad Adriano Dosch cun sia bella atmosfera. Per el datti in bon da 200 francs.
Las fotos originalas e l'argumentaziun da la giuria
-
Bild 1 von 5. Rang 1: Simmetria perfetga. Sper il tschierv da diesch, dat en egl ch'il chatschadur Christian Simeon è amez la fotografia – en simmetria cun ils culms, la pizza e la tschajera. Bildquelle: Corsin Simeon.
-
Bild 2 von 5. Rang 2: Transport original. Sin l'emprima egliada pudess ins crair che quai saja ina foto dal Canada. Igl èn dentant Remo Bundi e Clau Giusep Monn che transportan lur preda. Bildquelle: Walter Monn.
-
Bild 3 von 5. Rang 3: Atmosfera mistica. Era quai è la chatscha, surtut tar la bell'aura da quest onn: Returnar da la chatscha da chamutschs en ina bellezza rendida dal sulegl. Bildquelle: Adriano Dosch.
-
Bild 4 von 5. Rang 4: Plaschair da chatscha. Betg la preda stat en il center, mabain il plaschair da Johannes Josty che ha sajettà ina chaura-chavriel a Frattüras (Engiadina Bassa). Bildquelle: Gianna Carpanetti.
-
Bild 5 von 5. Rang 5: Respect vers l'animal. Il chatschadur Janic Fallet na mussa ses buc-chamutsch betg mo en la culissa spectaculara da la Val Mora – el mussa era respect vers l'animal. Bildquelle: Petra Fallet.
Immens gronda schelta – immens greva lavur
La giuria da chatscha n'ha betg gì ina simpla lavur: Ord bunamain 250 fotografias ha ella dastgà tscherner be tschintg. Cler che quai ha duvrà bleras discussiuns, argumentaziuns e forsa era in u l'auter cumpromiss aifer la gruppa.
Nus avain vulì resguardar tut las regiuns, il respect envers l'animal e mussar la variaziun da la chatscha grischuna.
L'um dal fatg en la giuria fa er in cumpliment a chatschaduras e chatschadurs: Adina dapli fotografias vegnan fatgas senza buis, ubain enten tegnair correct l'arma ed i vegn era fotografà cun respect ils animals. Plinavant èsi da dir: Quest atun è l'aura natiralmain era stada ideala per fotografar.
L'atun porscha in'atmosfera speziala, cunzunt la bun'ura e la saira cun las colurs ubain la tschajera mistica.
I na fa pia betg surstar che RTR ha survegnì bleras fotografias cun impressiuns da culms e valladas, da levadas e rendidas dal sulegl – sper las fotografias da las predas. La giuria è pia stada fitg cuntenta ed impressiunada da las fotografias ch'il public dad RTR ha mess a disposiziun.
Las fotografias da chatscha vegnan mintg'onn pli bellas e mintg'onn vegn nossa lavur pli greva.
Sco gia l'onn passà han trais persunas fatg part a la giuria:
- Cundrau Spescha, fotograf d'animals e da natira
- Walter Candreia, redactur «Chatschadur Grischun» e sez chatschadur
- Corina Luck, redactura online tar RTR e betg chatschadura
Tgi che vul sfegliar anc ina giada en omaduas galarias, po gugent far quai: