Dus commembers da nossa giuria per fotografias da chatscha – Cundrau Spescha (fotograf da natira) e Walter Candreia (manader da redacziun Chatschader Grischun) – èn vegnids en il studio per dar tips e trics per far fotografias da qualitad. Qua ils pli impurtants aspects d'ina buna fotografia:
- sa decider per ina culissa
- tscherner l'object principal
- resguardar la glisch
- pli pauc po esser pli bel
La culissa
Cun la culissa dal maletg manegian noss experts la cuntrada nua ch’ins sa chatta. Quai po esser ina bella vallada, cuntradas cun muntognas ubain era in bel guaud en bleras colurs.
L’object principal da la fotografia
Sch'il fotograf u la fotografa è sa decidida per la culissa, èsi sco proxim da sa decider per l'object principal da la fotografia. Quai po esser in animal, in chatschader u ina chatschadra, ina levada dal sulegl u er in toc lain. Uss èsi d'inscenar bain l'object ch'ins ha elegì.
La glisch è impurtanta
Tut è pront per la fotografia, ma uss glischa il sulegl en la camera. Grev per il fotograf, perquai che la sumbriva fa vegnir stgira la fatscha da las persunas u dals animals. Meglier è sch’ins fa la segira che la glisch vegn da las varts en la fotografia u idealmain da davos la camera. Uschia è l'illuminaziun per la scena ideala.
Far fotografias cun il telefonin
Per Cundrau Spescha è cler che la maioritad dals chatschaders e las chatschadras hajan ozendi in telefonin cun els. Quels telefonins èn capabels da far fotografias fitg bunas. In aspect saja pero impurtant da risguardar: betg far las fotografias vertical, pia en stil d’Instagram. Per nossa conoccurenza èn fotografias en la horizontala pli adattadas.
Tge che na tutga betg sin ina fotografia da chatscha
Tar ina tematica èn noss experts perina: evitar memia bler sang. Far ina fotografia gist suenter sajettar la preda na saja ozendi per exempel betg pli necessari. Ed era schi’ns fa ina fotografia cun il butin, saja da desister sin l’arma enta maun, perquai ch'ins emblidia spir emoziuns gugent da tegnair gist il schluppet. In «no-go» da tuts dus experts: plazzar la preda en ina posiziun betg natirala.
Bellas fotografias era senza il butin
La chatscha è tenor noss experts bler dapli che mo la preda. Ella è vasta, l'animal be ina pitschna part. Chaminar avant l’alva sur il guaud, u curt avant ch’il sulegl va sut davant chamona, èn be dus da las bleras culissas pussiblas da far fotografias cun l'effect da «wow». E quel effect da «wow» tschertga nossa giuria per la pli bella fotografia da chatscha.
Or da l'archiv
Tschiffar l'atmosefera da l'atun e la natira, forsa betg exnum durant la chatscha, quai è era la fascinaziun da Corina Bässler-Clopath e Fadri Muoth. En ina pitschna seria avain nus accumpagnà els dus durant lur process creativ.
