Il telefonin stgalina. Curdin è sin telefon cun Gabriel, igl è las 4:30 uras e la tschajera n'è anc betg ora. Gabriel decida dad anc durmir ina runda. Els guardan pli tard anc ina giada schebain els vulan ir ora. Munta che nus da RTR pudain era anc durmir in zic pli ditg che ier. Qua avain nus natiralmain nagut encunter.
Las 7:30 levain nus lura era. Stefan e Curdin èn gia pronts per ir si en la chamona dals chatschaders. Lezs èn entant era levads ed han chattà in bun program alternativ cunter la tschajera: Els dattan ina runda «Tgau sep». I vegn filmà e documentà e silsuenter turnan Stefan e Curdin, nus mangiain gentar. Curdin decida d'accumpagnar Ursin che parta curt suenter gentar engiuvers.
Il telefon...
I va ina duas uras e lura vegn il telefon – Ursin ha sajettà in buc chavriel! Ussa hai dad ir svelt: pachetar ed ir giu al lieu per rapportar. Angela vegn era gist per far radio, jau fatsch in live-stream sin Facebook e silsuenter fotografias. Mussar il respect envers l'animal cun la dascha en bucca e suenter prender ora l'endadens. Tut suveran capita quai d'Ursin, che va pir il segund onn a chatscha. El baiva anc la palorma e lura è era gia ses bab cun ses frars avant lieu per transportar engiu la preda. Nus turnain cuntents en chamona ed elaborain subit il material.
-
Bild 1 von 9Legenda: Emprima preda per ils da Cungieri: in buc chavriel RTR, Seraina Derungs -
Bild 2 von 9Legenda: Ursin prenda ora l'endadens da l'animal. RTR, Seraina Derungs
-
Bild 3 von 9Legenda: Ils rests dal endadens vegnan mess da la vart per las vulps. RTR, Seraina Derungs
-
Bild 4 von 9Legenda: Era biro èsi da far, nudar nua e tge ch'ins ha sajettà. RTR, Seraina Derungs
-
Bild 5 von 9Legenda: Natiralmain che la palorma na dastga betg mancar. RTR, Seraina Derungs
-
Bild 6 von 9Legenda: In bun schluc vinars, in viva sin la preda. RTR, Seraina Derungs
-
Bild 7 von 9Legenda: Ursin porta la preda giu sper via nua che ses bab spetga cun l'auto. RTR, Seraina Derungs
-
Bild 8 von 9Legenda: La saira spetga il menu obligat suenter ch'ins ha sajetta insatge: Gnirom, cor e gnirunchel cun bizochels, giabus cotschen a maruns cun glasura. RTR, Seraina Derungs
-
Bild 9 von 9Legenda: Bun appetit e viva! RTR, Seraina Derungs
Dir dal chavriel per tschaina
Entant èsi vegnì saira, i n'ha dà naginas autras predas. Menu da tschaina: Natiralmain il dir dal chavriel ed il cor e gnirunchel cun bizochels, giabus cotschen e maruns cun glasura. Quai tutga tiers tar la chatscha, definitivamain! Il menu gusta stupent, era nus da RTR dastgain mangiar cun ils chatschaders. I vegn saira tard, las 2:00 essan nus lura era en letg. Buna notg!
RR actualitad 06:00