Enturn 60 lufs duain vegnir eliminads en il chantun Grischun, 16 lufs giuvens han chatschaduras, chatschadurs e la guardiaselvaschina fin qua sajettà. Quai mussan las cifras actualas dal monitoring dal chantun. Da quels 16 lufs sajan dus vegnids sajettads da chatschaduras u chatschadurs, il rest da la guardiaselvaschina. Eliminar dal tut vul il chantun ils trieps dal Vorab, Corn da Lantsch e Fuorn. Da tut ils trieps en il Grischun n'èn be ils trieps da Valgronda e Glattwang betg part da la regulaziun, perquai ch'els han memia paucs u nagins lufs giuvens.
La regulaziun dal luf cuntinuescha per la guardiaselvaschina fin la fin da schaner 2025. Durant la chatscha speziala èsi puspè previs che chatschaduras e chatschadurs sustegnan la guardiaselvaschina per eliminar ils trieps dal Vorab, Corn da Lantsch e Fuorn.
Era part dal monitoring fa il dumber dals animals stgarpads. Las cifras mussan ch'ils lufs han stgarpà pli paucas nursas e chauras l'onn 2024 che l'onn 2023.
Naginas cifras exactas davart chatscha auta
L'Uffizi da chatscha e pestga quinta che circa 3'500 tschiervs èn vegnids sajettads durant la chatscha auta. Tar ils chamutschs e chavriels na datti anc naginas cifras. Tenor il responsabel da l'Uffizi da chatscha e pestga, Lukas Walser è la chatscha auta stada en media dals onns passads.
