Glindesdi cumenza puspè la chatscha per rund 5’500 Grischunas e Grischuns. Betg be tschiervs, chamutschs e chavriels vegnan avant la buis, mabain er lufs. Quai era atgnamain previs. Il chantun ha dumandà a l'Uffizi federal d'ambient (BAFU) da pudair sajettar 30 dals 45 lufs pitschens e dus entirs trieps. Sin la lubientscha da Berna spetgan ins dentant anc adina, uschia la ministra d'ambient, Carmelia Maissen. Quai fetschia surstar ella. Atgnamain hajan ins gia avant ditg coordinà quai.
Jau sun fitg trumpada da quel agir da la vart dal BAFU. Tenor mai n'è quai betg acceptabel.
Nagina lubientscha, nagina chatscha sin lufs. Ils chatschaders e a las chatschadras ch'han survegnì in permiss dal chantun na dastgan pia anc betg sajettar in luf, sch'els vesan in. Ch'ins haja inoltrà la dumonda memia tard a la Confederaziun, dementescha Maissen. Gia da primavaira hajan ins prendì si in'emprima giada contact cun la Confederaziun.
BAFU ha fixà termins
Sper quai hajan ins stuì spetgar giu ina sesida da coordinaziun nua ch'il BAFU ha definì il termin. Tuttina hajan ins gia la fin da fanadur inoltrà emprimas infurmaziuns al BAFU, per ch'el possia gia sa preparar sin la dumonda uffiziala. Pir suenter questa sesida, avant radund duas emnas, ha il chantun lura pudì inoltrar uffizialmain las dumondas. Il chantun saja ì da quai or ch'il BAFU saja pertschert da ses tempo da lavur e che las lubientschas sajan sin maisa ad uras.
![Karte von Graubünden mit markierten Orten und einem Punktestand.](https://www.rtr.ch/static/cms/images/960w/958dabb.jpg)
Speranza per proxim'emna
Carmelia Maissen spera che la lubientscha da Berna vegn en il decurs da l'emna proxima. Lura vegnian ins ad infurmar ils chatschaders e chatschadras tge ch'è pussibel. Cler saja gia uss: Ils chatschaders e chatschadras dastgan be gidar a regular ils trieps e singuls lufs creschids. Sin ils lufins na dastgan els betg sajettar. Tge consequenza ch'il retard da la regulaziun ha sin las finamiras dal chantun, na possian ins anc betg stimar.
Adattà al tema