Curt & concis:
- 9 firmas da construcziun grischunas pajan 5 enfin 6 milliuns francs sco cumpensaziun per donns.
- Perquai pon ellas offrir er vinavant, sch'il chantun scriva ora lavurs.
- A quai è il chantun sa cunvegnì cun las firmas da construcziun – quai sin recumandaziun da la Cumissiun da concurrenza WEKO, scriva il chantun.
- La WEKO inquirescha numnadamain cunter las 9 interpresas pervi da cunvegnas illegalas en il sectur da cuvridas da via en tut il chantun (senza Moesa).
- Tras la cunvegna vul il chantun evitar lungas proceduras giuridicas.
Las inquisiziuns actualas da la WEKO èn la cuntinuaziun da las inquisiziuns ch'avevan manà a la glisch en avrigl 2018 il scandal da cartels da firmas da construcziun en Engiadina Bassa.
En il focus actual: Las cuvridas da via en Grischun
En questa segunda part da las inquisiziuns en la branscha da construcziun grischuna ha la WEKO prendì sut la marella l'affar cun las cuvridas da vias – quai tranter il 2004 ed il matg 2010 e quasi en tut il chantun.
Durant quellas inquisiziuns haja la WEKO rendì attent a la pussaivladad, ch'ina cunvegna tranter chantun e firmas pertutgadas possia effectuar ina reducziun da la multa che las firmas hajan da pajar.
Quant intensiv è stà il stumpel dal WEKO?
Uss ha il chantun communitgà dad avair fatg la cunvegna culs impressaris. Dentant – davart l'intensitad, cun la quala che la WEKO haja dà il stumpel a la cunvegna, datti duas opiniuns.
Fertant ch'il chantun scriva da «l'appel dal secretariat» da la WEKO als impressais e la «remartga ch'ina enclegientscha possia effectuar ina reducziun da la multa» metta Frank Stüssi da la WEKO pais sin il fatg, che «il secretariat da la WEKO n'haja betg intimà ils impressaris da far ina cunvegna cun il chantun». El haja be «mussà si ina tala pussaivladad.».
Cler è actualmain: La WEKO n'ha anc betg terminà l'inquisiziun. Betg decis è, quanta valur ch'ella vegn a dar a questa cunvegna tranter chantun ed impressaris: Quai stettia numnadamain en la «cumpetenza da la WEKO», precisescha Frank Stüssi.
La cunvegna d'enclegientscha cun las interpresas
Il chantun da sia vart veglia stgaffir ina «basa da nova confidenza en l'avegnir» cun las interpresas da construcziun. Perquai haja el fatg cunvegnas d'enclegientscha sur 5 enfin 6 milliuns francs cun 9 interpresas:
- Cellere
- Centorame
- Foser
- Hew
- Käppeli
- Mettler Prader
- Schlub
- Toldo
- Walo Bertschinger
Tut en tut fa la WEKO inquisiziuns cunter 15 firmas – cun 6 da quellas saja ella anc en tractativas per sa cunvegnir. Sper ils pajaments hajan las interpresas er s'obligadas d'introducir in program da compliance tenor il dretg da cartels, scriva il chantun en sia communicaziun tar la cunvegna. A quella cunvegna possian er s'associar vischnancas pertutgadas.
Mo in impressari prenda posiziun
RTR ha contactà las 9 firmas ch'han fatg ina cunvegna cun il chantun. Prendì posiziun ha dentant mo la firma Hew. Sin dumonda scriva il cumpossessur Thomas Roth, ch'els hajan fatg la cunvegna per puspè survegnir la fiduzia dal chantun. Vinavant vulessan els serrar giu in chapitel che giaschia schon bunamain 10 onns enavos. Sin la dumonda, sche la cunvegna saja ina confessiun d'avair fatg fauss insatge, n'entra el betg en sias respostas.
Evitar lungas proceduras giuridicas
Persuenter ha il chantun empermess a las firmas ch'ellas possian en l'avegnir puspè dar en lur offertas per las lavurs ch'il chantun scriva ora. Cun questa cunvegna veglia il chantun cuntanscher:
Grazia a las enclegientschas pon vegnir evitadas proceduras lungas e charas. A medem temp vegnan stgaffidas las premissas per che la concurrenza tar las acquisiziuns da prestaziuns da construcziun funcziunia er en l'avegnir.
Chantun offrescha cunvegna er ad impressaris en Engiadina Bassa
Il chantun haja mussà cleramain ch'el n'acceptia betg cunvegnas da cartel, accentuescha la regenza en sia communicaziun. Il chantun sa mussa dentant pront, da resguardar er tar ulteriuras interpresas la prontezza da collavurar en il segn da la cunvegna. Questa offerta sa drizzia «particularmain als impressaris da l'Engiadina Bassa».
Reacziuns positivas dal Cussegl grond
Sur tut las partidas ora èn deputadas e deputads sa mussads cuntents cun l'agir da la regenza en connex cun tut quai che saja capità en l'affera da cartel.
En ses pled en il Cussegl grond ha cusseglier guvernativ Mario Cavigelli accentuà che la regenza veglia bain lavurar si il passà, dentant era guardar en l'avegnir.
RR novitads 09:00+
