Unda da chalira - 40 grads en lavandaria fan suar

Las temperaturas d'enfin 38°C a Cuira e conturn difficulteschan ad in u l'auter la lavur. Uschia per exempel a tut quels che lavuran sin plazzals da construcziun en il liber.

Temperaturas d'enfin 40°C

Er en il suar vegnan ils collavuraturs e las collavuraturas da Claudio Hauser che maina la lavandaria «Zentralwäscherei» a Cuira. Las maschinas da lavar ed ils sientaders stgaudan la halla da producziun sin enfin 40 grads. Climatisar il lieu da lavur è tenor il manader nagina opziun. «Quai duvrass uschè blera energia – e fiss in putgà ecologic.»

Per Nikolaus Albin che lavura gia dapi 29 onns en la lavandaria n'èn las temperaturas nagin problem. Cunquai ch'el haja adina fatg fain sin plauncas stippas en Lumnezia sco giuven saja el disà vid las chalurs. Impurtant saja simplamain da far pausas e betg emblidar da baiver avunda aua.

Lavurar dasper furnels chauds

Ma er endadens datti lavureras e lavurers che n'han betg simpel. Uschia sua er il pasterner Arthur Bühler che fa mintga bun'ura paun en sia pasternaria «Zuckerbäckerei» a Cuira. Ma ozendi na saja quai betg pli uschè nausch cun las temperaturas en pasternaria sco avant decennis. Lura vegniva il pasterner pli fitg en il suar. Grazia ad il svilup tecnic èsi ozendi pli agreabel. Auter vesi or cun las pastizerias – cun las temperaturas actualas na possian els betg far pralines u autras pastizerias.

RR actualitad 07:00