Sco cun la lodola da prada vai cun blers utschels. Quai sa mussa er en la lavur quotidiana da la gruppa da lavur ornitologica dal Grischun OAG. Ella s’engascha dapi 40 onns per la perscrutaziun e la protecziun dals utschels en il Grischun.
-
Bild 1 von 7Legenda: Ella perda: La lodola da prada (alauda arvensis) Christoph Meier-Zwicky -
Bild 2 von 7Legenda: Per exempel l'Alp Flex - il nov spazi da viver da la lodola da prada. Christoph Meier-Zwicky
-
Bild 3 von 7Legenda: Ella gudogna: La sfunsella da la cresta (podiceps cristatus). Christoph Meier-Zwicky
-
Bild 4 von 7Legenda: Il lai da Segl - nov spazi da viver per la sfunsella da la cresta. Christoph Meier-Zwicky
-
Bild 5 von 7Legenda: Ella perda: La giaglina selvadia (tetrao urogallus). Christoph Meier-Zwicky
-
Bild 6 von 7Legenda: Il spazi da viver ideal per il cot selvadi. Christoph Meier-Zwicky
-
Bild 7 von 7Legenda: El gudogna: Il milan cotschen (milvus milvus). Christoph Meier-Zwicky
Il mund da la lodola è sa midà drasticamain
Il svilup central durant quests 40 onns è il midament drastic dals spazis da viver. Cun cultivar intensivamain la cuntrada na porscha quella betg pli las nischas che blers animals u plantas dovran per surviver. Uschia è vegnida stgatschada la lodola da prada si en ils auts.
In auter diever intensiv, numnadamain quel dals guauds, influenzescha la populaziun dals cots selvadis u urugals. Per pudair viver e surviver dovran els gronds guauds quiets. Er da quels na datti betg pli tants en il Grischun. La consequenza: Il cot selvadi è fermamain periclità.
Il milan cotschen è in gudagnader dal midament
Fertant ch’il midament sforza spezias da sa retrair datti er utschels ch’èn sa chasads da nov en il Grischun. Dapi diesch onns cua il milan cotschen en il Grischun. Er sch’el è il terz grond utschè da preda (suenter tschess barbet ed evla) è el tenor ils experts in animal plitost da caracter defensiv che maglia en emprima lingia insects e forza ina u l’autra giada in mieur.
Medemamain dapi var diesch onns cua la sfunsella da la cresta sin ils lais da l’Engiadin’Ota. Uss datti gia var 10 pèrins.
214 spezias d’utschels cuan en Svizra
Quants ch’èn en Grischun n’è il mument anc betg cler. Qua speran ils experts sin il nov atlas d'utschels ch’è en elavuraziun tar la Staziun ornitologica svizra da Sempach.
Fin quest onn èn vegnids dumbrads ils utschels en Svizra. Uss vegnan elavuradas las datas ed en in enfin dus onns speran ils experts da la gruppa da lavur ornitologica dal Grischun OAG da savair tgi ch’è sa chasà e tgi ch'ha bandunà il Grischun.