-
Bild 1 von 5Legenda: Material da biro possian ins uss er cumprar tar ils grossists – quai fa squitsch. RTR, Nora Baltermia -
Bild 2 von 5Legenda: Bleras papeterias han extendì lur sortiment. RTR, Nora Baltermia
-
Bild 3 von 5Legenda: Las papeterias en las regiuns han er in'impurtanza turistica. RTR, Nora Baltermia
-
Bild 4 von 5Legenda: In'agenda en tut las colurs u in register spezial – las papetarias han in vast sortiment. RTR, Nora Baltermia
-
Bild 5 von 5Legenda: Cunzunt per regals sajan las papetarias ina buna adressa. RTR, Nora Baltermia
Il matg sto la Wega a San Murezzan serrar. Ils buns onns sajan passads e la svieuta saja sa reducida per la mesadad. I para dentant che la Wega na saja betg la suletta papetaria ch'è pertutgada da midadas. La concurrenza fa squitsch sin las papetarias grischunas. E quai, schebain sin quellas en las regiuns sco er sin quellas a Cuira.
Concurrenza moderna e concurrenza da grossists
Cunzunt la concurrenza sin ils chanals online engrevgeschia ils affars da a las papetarias. Ozendi possian ins empustar blers products a chasa, e quai senza pajar bler porto. Ma la concurrenza na vegnia betg mo dal mund modern: Tar blers grossists possian ins ozendi cumprar material da biro. Blers cumprian perquai il material da biro tar quels, ed en las papetarias mo pli las chaussas spezialas ch'ins na survegnia betg en ils auters affars. Quai manegia il schef da la papetaria Pfeiffer e da la papetaria Maggi a Glion, Erich Putzi.
Ils clients cumpran lur ordinaturs tar ils grossists e vegnan suenter tar nus per cumprar il register spezial per lur ordinatur.
Far da l'inimi in ami
La fiera è damai sa midada e las papetarias han stuì s'adattar. Ina midada che bleras papetarias han fatg è d'extender il sortiment. Uschia na datti betg paucas papetarias che vendan mo pli material da biro. U ch'ellas porschan er cudeschs, endrizzament da biro, termagls ubain material da zambregiar.
In'autra midada che bleras papetarias han fatg è da far da lur inimi in ami: Uschia porscha ina gronda part da las papetarias lur products entant er online. Tenor divers possessurs na giessi betg pli senza. Uschia fa Pfeiffer per exempel radund la mesadad da la svieuta cun ils affars online.
Mantegnair ils affars
Midar dal tuttafatg sin online na vulan bleras papetarias però betg. Tenor la possessura da la papetaria Koch a Cuira saja la cussegliaziun fitg impurtanta. Ins veglia il contact cun la glieud e quella stimia ina buna cussegliaziun.
Tenor Putzi na possian betg ils possessurs decider quai. Las papetarias possian mo porscher in stupent servetsch e far gust da vegnir en ils affars a cumprar las chaussas. La fin finala decidian dentant ils clients.
RR actualitad 12:00