Las mesiras chantunalas vegnan prolungadas enfin e cun ils 22 da december:
- Restaurants, pubs, bars, brasserias, bars (inclusiv talas che fan part da pasternarias, tancadis, staziuns, hotels u campadis) restan serrads.
- Lieus da divertiment e temp liber, sco per exempel teaters, kinos, mueums, centers da sport restan serrads.
- En scolas privatas e publicas vala sin l'entir areal da scola per tuttas persunas in obligatori da mascra. Quai cun excepziun da scolaras e scolars da la primara e scolina.
Il ticker è a fin
-
14:35
La conferenza da medias è a fin
Il Grischun resta pia anc almain enfin ils 22 da december en il mini-lockdown. La gronda finamira saja da sbassar las cifras e lura per Nadal e Bumaun pudair avrir pli ditg ed avair ina situaziun cun uschè paucas restricziuns sco pussaivel. Ils territoris da skis restan vinavant averts. La regenza appellescha dentant d'esser precaut cun far sport d'enviern.
La situaziun possian dentant adina sa midar, sche indicaturs sco las cifras da corona, las capacitads d'ospital, la cifra da reproducziun etc sa sviulppeschian da moda negativa lura decida la regenza novas mesiras.
-
14:31
Cultura e sport
Sper la gastronomia sajan er il sport e la cultura fermamain pertutgads da las restricziuns. Il minister d'educaziun Jon Domenic Parolini sincerescha dentant ch'i dettia agid. I vegnia a dar in credit supplementar per la cultura ed il sport. Quel stoppia la cumissiun da gestiun (GPK) anc deliberar.
-
14:29
Suprastanza Gastro Grischun haj chapientscha
Ins haja discutà la prolungaziun da las mesiras cun il president da Gastro Grischun Franz Sepp Caluori. Lez e la suprastanza mussian chapientscha da laschar serrà enfin avant Nadal, uschia Marcus Caduff.
-
14:27
Strategia da prolungar las mesiras
Il minister d'economia Marcus Caduff precisescha anc ina giada daco ch'il chantun scumonda vinavant d'avrir manaschis da gastronomia. El di ch'ins na vegnia enfin proxima sonda betg da reducir las cifras uschia ch'ins pudess avrir las ustarias enfin las 11 la saira, ed uschia profitar da la fatschenta da tschainas. Perquai hajan els decidì da prolungar, cun la finamira da suenter pudair laschar avert enfin las 11 la saira.
-
14:21
Gieu da poker cun ils territoris da skis?
In schurnalist vul savair sch'i na saja betg in gieu da poker sch'ins possia dar la lubientscha als territoris d'avrir u laschar avert. Peter Peyer di che la situaziun sa midia adina puspè. Actualmain saja el dentant da l'avis ch'ins possia lubir quai. Cunquai che la situaziun en ils ospitals sco er il svilup dals cas mussian en ina buna direcziun. Ins stoppia dentant adina puspè giuditgar da nov la situaziun.
Plinavant accentuescha Caduff er che serrar ils territoris na schligia betg il problem en ils ospitals. Pertge la glieud vegnia tuttina en il Grischun, giaja lura enstagl a scarsolar u a far turas e chaschunia là accidents.
-
14:19
Dumondas da schurnalistAs
La runda è averta per dumondas da schurnalistas e schurnalists.
-
14:19
Scolas: obligatori da mascras
Sin ils areals da las scolas publicas e privatas vala enfin ils 23 da december in obligatori da mascras. Betg pertutgads èn scolaras e scolars primars e da scolina. Uschia ha infurmà il minister d'educaziun Jon Domenic Parolini.
-
14:16
Betg prender risicos
Caduff appellescha en connex cun far sport d'enviern da prender uschè pauc risico sco pussaivel. Pia betg ir ord las pistas, far turas u autras activitads da risico, per uschia betg strapatschar il sistem da sanadad supplementarmain.
-
14:14
In zic normalitad tranter Nadal e Bumaun
La regenza saja stada en contact cun la branscha da gastronomia sco er cun las pendicularas. Quels hajan mussa ina tschertga chapientscha per prolungar il pachet da mesiras. Marcus Cauduff spera lura er ch'ins possia porscher a quellas branschas sco er a la populaziun in temp cun pli paucas restricziuns tranter Nadal e Bumaun.
-
14:12
Indicaturs mussan en la dretga direcziun
Il minister d'economia Marcus Caduff di ch'ins saja sin la dretga via. El spera che quai trend cuntinua e ch'ins possia suenter ils 22 da december avrir ils manaschis serrads. La finamira saja lura da pudair laschar avert la gastronomia enfin la saira da las 11. Lura sto la cifra da reproducziun dentant esser per 7 dis sut 1 (tenor decisiun Confederaziun).
-
14:07
Situaziun en ils ospitals
La situaziun sin las staziuns intensivas saja actualmain tendida, ha declerà Peter Peyer. Uschia sajan stan oz 13 dals en tut 16 letgs d'intensiva da l'Ospital chantunal a Cuira occupads. A Samedan sajan 3 da 6 plazs d'intensiva occupads.
-
14:05
Mesiras dal chantun valan enfin ils 22 da december da mesanotg
La regenza prolunghescha las mesiras chantunalas ordinadas avant bun 10 dis. Uschia restan ustarias e lieus da temp liber sco kinos, teaters u fitness serrads enfin ils 22 da december.
Ils territoris da skis restant vinavant averts. Ils davos dis e las davosas emnas hai adina puspè da grondas discussiuns sch'ins duai serrar ils territoris da skis u betg.
-
14:05
Rapports da medias
La conferenza avra il minister da sanadad Peter Peyer. Sco emprim fa el in commentari davart rapports da medias ch'hajan duvrà citads dad el ord la sesida dals directurs da sanadad cun cusseglier federal Alain Berset. I saja cuntraproductiv sch'i dettia en quels gremis persunas che na tractian las infurmaziuns betg a moda confidenziala.
-
14:03
La conferenza da medias va liber
Ils 11 da december aveva la regenza grischuna serra ustarias e lieus dal temp liber per duas emnas.
-
13:59
Ospitals pudessan vegnir als cunfins
Actualmain hajan ils ospitals anc letgs vids. Quai pudess dentant sa midar durant la stagiun auta d'enviern sch'i dettia blers accidents da skis. Uschia ha ditg ier, glindesdi il minister da sanadad Peter Peyer.
-
13:54
Bainvegni
A partir da las 14:00 infurmescha la regenza grischuna davart las novas mesiras da corona. La regenza ha gì oz sesida en chaussa. Pled e fatg dattan:
- Peter Peyer, minister da sanadad
- Marcus Caduff, minister d'economia
- Jon Domenic Parolini, minister d'educaziun
