Bun da savair en quest connex: Il derschader Peter Schnyder è commember da la PBD. El è quel che ha fatg attent sin il cas d'ierta , nua ch'il president da la dretgira Norbert Brunner duai avair midà ina sentenzia en atgna reschia. La Partida burgaisdemocratica pretenda perquai vinavant che Schnyder vegnia reelegì sco derschader – cuntrari a la proposta da la cumissiun da giustia dal Cussegl grond che ha sclerì ils svaris en la Dretgira chantunala.
Las ulteriuras posiziuns
Tut las fracziuns deploreschan quai ch'è capità e sa mussan prontas per sclerir tut ils fatgs. La fracziun socialdemocratica pretenda dapli transparenza: Ella propona da publitgar il rapport cumplessiv da la cumissiun e betg mo la resumaziun. La fracziun liberaldemocratica deplorescha il donn da reputaziun ch'ils svaris han per la Dretgira federala. La fracziun da la PPS vul s'exprimer davart persunalias pir suenter avair tadlà tut las derschadras e derschaders. Ella crititgescha dentant che quatter commembers da la Dretgira chantunala èn sa preschentads dacurt a las medias ed han crititgà la lavur da la cumissiun da giustia. La fracziun cristiandemocratica ha communitgà ch'ella vegnia a decider pli tard davart las elecziuns da la Dretgira chantunala. Proxim glindesdi vegnia ella a tadlar il president da la dretgira, Norbert Brunner, ch'è dal reminent da la PCD.
Omadus derschaders sa dostan dal reminent: Peter Schnyder sa metta a disposiziun per in'ulteriura perioda d'uffizi:
Ed il president da la Dretgira chantunala Norbert Brunner na lascha betg valair d'avair malduvrà ses uffizi e sfalsifitgà documents: El haja simplamain mess en urden ina sentenzia.
Elecziun pir l'avust
L'elecziun dals derschaders fa il Cussegl grond pir en sia sessiun d'avust. Proxima emna tracta il parlament dentant la proposta da la cumissiun da giustia da betg reeleger Peter Schnyder sco derschader. Plinavant stat era ina reclamaziun da Norbert Brunner cunter la cumissiun sin la glista da tractandas.
Dacurt ha la cumissiun da giustia dal Cussegl grond preschentà ses rapport e sias recumandaziuns: