La situaziun epidemiologica en il Grischun è sa meglierada en il decurs da la davosa emna. Ins haja dentant er fatg in toc pli paucs tests sur ils dis da festa, quai haja sbassà las cifras en l'entira Svizra, uschia ha ditg Patrick Mathys dal BAG. Las cifras sajan perquai da vesair cun precauziun.
En il Grischun vesi actualmain or uschia:
- Cifra d'incidenza da 7 dis è tar 253,2, ed uschia sut la media svizra
- Cifra da reproducziun è tar 0,83, ed uschia sut 1 (valur per schluccar mesiras da la Confederaziun)
In ulteriur criteri decisiv è la situaziun en ils ospitals dal chantun. Tenor la media chantuala Marina Jamnicki sajan ils cas da corona sin l'intensiva constants. Ils ospitals dettian er dumogn als accidents da skis.
Mesemna infurmescha la regenza
Las cifras ed ils criteris per decider schluccadas en il chantuns adempliss il Grischun pia. Mintga chantun po schluccar mesiras sche la situaziun epidemiologica lascha tiers quai. Pussaivel fiss p.ex. d'avrir ustarias e bars ubain indrizs da sport. La regenza grischuna fa damaun mesemna in update davart la situaziun actuala en il Grischun.
