La Dretgira administrativa dal chantun Grischun na vesa nagina discriminaziun da paja da las mussadras da scolina en il Grischun. Quai communitgescha LEGR, la magistraglia Grischun.
LEGR è indignà
La dretgira haja refusà il plant da singulas persunas, l'Uniun da la magistraglia LEGR e da la centrala da dunnas Grischun. I saja inacceptabel che la dretgira haja prendì suenter trais onns e mez ina decisiun che sa basia sulet sin in tractament superfizial d'ina expertisa da la cuntrapartida, scriva la Magistraglia Grischun. Ils planschiders avevan pretendì in giudicament independent dal pensum da las mussadras da scolina.
En il chantun Glaruna haja in tal giudicament neutral da la lavur cumprovà ina valitaziun pli auta da la lavur en scolina. La dretgira grischuna haja però refusà quai e na renconuschia er nagina incumbensa directiva da las mussadras.
Uschia betg
Questa sentenzia saja offendenta ed inacceptabla. Els n'acceptian betg simplamain questa decisiun e pondereschan uss ils proxims pass pussaivels, scriva LEGR. Ils proxims dis veglia l'associaziun da magistraglia sclerir, schebain ella tiria vinavant il cas al Tribunal federal u betg.
