Chantun - Viadi culinaric enturn il mund senza bandunar Cuira

Qua ina morsa d'in burger, là forsa in cugn d'ina pizza ubain tuttina anc ina pitschna rolla da primavaira ubain ina culla falafel per empruvar? A l'uschénumnà «Streetfood-festival» han artists da cuschina preparà pasts da l'entir mund per ils passants. Pasts enconuschents dentant er main enconuschents – sco per exempel il tartuffel tornado u ils «Bitterballen» ollandais. Questa giada dura il festival dals pasts sin via quatter dis: A partir da venderdi sur tut la fin d'emna da Tschuncaisma – e quai mintgamai da las 11:00 enfin las 23:00.

Viadi culinaric enturn il mund

Tar mintga stan duai dar pitschnas purziuns per che las visitadras ed ils visitaders possian sagiar differents pasts internaziunals. Tar 30 differents stans datti purschidas cun cuschinas regiunalas, asiaticas, veganas, americanas ed europeicas. La finamira dals organisaturs: Ils pretschs duajan esser fairs e restar tranter 7 e 15 francs. Sper ils stans da spezialitads datti er duas bars ed ina tribuna nua ch'i vegn sunà mintg'ura musica live.

In buffet da desserts en il curtin da la Viafier retica

Tut ils stans èn en la vischinanza da la via da la staziun. Nov è, ch' ils stans cun dultscharias èn en il curtin da la chasa da la Viafier retica.

Organisaturs èn fitg cuntents

Tar la segunda ediziun dal festival han ils organisaturs spetgà almain tants visitaders sco l'onn avant – numnadamain radund 18'000. Sco ils organisaturs han infurmà sajan els fitg cuntents cun l'eveniment e fetschian quint che schizunt dapli persunas che spetgà hajan visità il festival culinaric. La cifra exacta sappian els però communitgar pir il mardi.

Cuntents sajan ils organisaturs era, ch'i haja funcziunà quest onn meglier cun il rument. L'onn passà avevi dà critica pervia dal sistem da rument al festival.

RR actualitad 17:10