Perquai ch'in recurs cun num identic era anc pendent tar la Dretgira administrativa dal Grischun, aveva il Tribunal federal sistì la procedura la fin d'october dal 2017. Uss ha il Tribunal federal reprendì la procedura tar il recurs cunter il sistem da maiorz per eleger il Cussegl grond dal Grischun.
La Dretgira administrativa n'è betg entrada en chaussa perquai ch'il represchentant legal, Thomas Auer, n'era betg autorisà da recurar. Auer n'era il mument dal recurs betg inscrit en il register chantunal dals advocats.
Betg mintga vusch ha la medema valur
Il recurs era vegnì inoltrà il settember dal 2017 da 54 persunas cun dretg da votar en il Grischun e da la partida socialdemocratica ensemen cun quatter partidas pitschnas. Ils recurrents crititgeschan che betg mintga vusch haja la medema valur cun il sistem da maiorz. Il Tribunal federal duai examinar il sistem electoral da maiorz sin sia confurmitad a la constituziun e quai en vista a las elecziuns dals 10 da zercladur da quest onn.
RR novitads 12:00