Cunquai che l'uvestg Vitus Huonder vegn ils 21 d’avrigl 75 onns ha el d'offrir al papa sia desditga. Enstagl dad ir la via usitada ed eleger in nov uvestg diocesan vuless l'allianza «Es reicht!» in administratur sco successur da Vitus Huonder.
Administratur na po era betg quietar la situaziun
L'administratur duai tenor la petiziun quietar la situaziun en l'uvestgieu da Cuira. Mariano Tschuor, president da la cumissiun da medias dals uvestgs Svizzers, sa dentant betg tge avantatgs ch’in administratur avess. Quel stuess numnadamain er avair las medemas cumpetenzas sco in uvestg diocesan. Pertge sch’el n'haja betg questas sche na possia el era effectuar nagut.
Decisiv n'è betg administratur u uvestg diocesan
Per Mariano Tschuor vai dentant betg per la dumonda administratur u uvestg diocesan: «I va per la persuna.» Pussaivlas sajan numnadamain omaduas vias. I stoppia esser ina persuna che sappia persvader la glieud per la cardientscha, sappia ir enturn bain cun la glieud sco era ina persuna che sappia manar bain l'uvestgieu ed il seminari da spirituals.
RR actualitad 12:00
