Critica hai gia dà differentas envers la candidatura actuala dals gieus olimpics 2026 en Grischun. La gronda part na saja però betg giustifitgada, di Jürg Michel dal comité. La critica da betg avair fatg avunda èn las raits socialas lascha el dentant valair. Ins haja stuì chanalisar las resursas ferm limitadas e far quai tge ch’ins sappia bain e ch’ins stoppia gia far baud avunda.
Creà comité da basa
Uschia han ins per exempel creà in comité da basa cun passa 500 persunas. Quellas duajan en las regiuns persvader la populaziun da dir da gea als gieus olimpics. Era ils placats e flyers hajan duvrà temp per crear ed empustar. Ussa sajan ins dentant pront per dar gas. La lavur en las raits socialas vulan ils iniziants uss er intensivar. Dentant na vegnia betg a dar films professiunals u sumegliant. Per quai manchian las resursas.
Crear fidanza cun contact direct
Ins saja persvas da pudair crear dapli fidanza ed era emoziuns cun il contact direct e persunal enstagl da la via sur la rait. Era sche quai para dad esser la devisa, na vulan ils responsabels betg survalitar l’impurtanza da las raits socialas. Ellas n’hajan simplamain betg la medem gronda prioritad, uschia Jürg Michel vinavant.
RR actualitad 07:00