En tschertas regiuns dal Grischun datti blers tschiervs. Quai tranter auter er pervia dals ultims envierns ch’èn stads miaivels. Tenor il plan da reducziun da la regenza ston perquai vegnir sajettads 5’370. Quai èn 160 dapli che l’onn passà.
District da chatscha Signuradi-Partenz
En il district da chatscha Signuradi-Partenz smanatscha er la tuberculosa. Cun in project da pilot vegni uschia er lubì da sajettar durant trais dis en nov asils, quai animals feminins che na mainan betg.
Ultra da quai èsi lubì da sajettar tschiervs lantschet, independent da la lunghezza da lur corna. Questa nova regulaziun vala fin ils 10 da settember en l’entir district da chatscha - era dador ils asils - senza limitas da dumber.
Da verd sin oransch
Da nov èsi er obligatoric da purtar vestgadira luminusa sin la chatscha da gruppas. La segirtad da persunas che prendan part a chatscha en gruppa duai vegnir augmentada. La restricziun da quatter persunas per gruppa vegn per la chatsch’auta e la chatscha speziala abolida. Per la chatscha bassa vala ella vinavant.
Giasts da chatscha bainvis
Cun il plan da reducziun vegn introducì ina charta da giasts per dis limitads. Mintga chatschader ch'ha ina patenta da chatsch’auta 2017 po durant dus dis envidar in giast.
RR novitads 09:00