Suenter ch’il Cussegl grond ha debattà ier ditg sur da la dumonda, schebain er vischnancas duain esser suttamessas a la nova lescha da transparenza u betg, n’hai betg pli dà blera discussiun oz. La nova lescha da transparenza è vegnida acceptada cleramain cun 98 tar 14 vuschs. Las vischnancas na ston betg introducir la transparenza.
Plinavant han las deputadas ed ils deputads decidì, che tgi che vul avair invista en documents uffizials dal chantun, po far quai per il pli gratuitamain, prendì or sch’il tractament d'ina dumonda è collià cun expensas considerablas.
La nova lescha è applitgabla sin ils documents uffizials dal chantun ch'èn vegnids elavurads ubain retschavids davent da l’entrada en vigur da la nova lescha.
Sclerì gia ier il punct dispitaivel
Schebain las vischnancas vegnan er obligadas d’introducir il principi da transparenza ha il Cussegl grond decidì ier. I ha dà in NA cun 60 cunter 53 vuschs. Surtut la PCD e la BPD èn sa dustadas cunter l’obligaziun per las vischnancas da dar invista en documents uffizials. L'argument principal è stà che surtut en vischnancas pitschnas sappia mintgin tge persuna che saja manegiada, era sch'ils nums vegnissan anonimisads en ils documents.
Per integrar era las vischnancas en la lescha da transparenza ha - sper la PLD - era in'allianza nun-sontga da PS e PPS cumbattì. Ulteriurs detagls da lescha e la votaziun finala suondan en la debatta da mardi.
RR novitads 10:00