Nov onns ditg ha Urs Cadruvi manà la Lia Rumantscha. Bainprest suenter sia demissiun avevan las speculaziuns cumenzà. Insatgi cun in profil sco Urs Cadruvi è stà giavischà da las uniuns affiliadas da la Lia. Uss è cler tgi che daventa ses successur. La suprastanza da la Lia Rumantscha ha elegì il manader da la chanzlia da Glion, Martin Gabriel sco nov secretari general. El entra en uffizi il fanadur 2017.
S'annunziadas per la plazza n'eran pli pauc che diesch persunas aveva Johannes Flury, il president da la Lia Rumantscha ditg ad RTR. Tranter quellas annunzias n'eran naginas da dunnas.
Gabriel dettia in signal per cuntinuitad
El enconuschia fitg bain il moviment rumantsch e saja avert per novas sfidas, scriva la Lia. La suprastanza da la LR è cuntenta d'avair cun Martin Gabriel ina persuna cun experientscha per diriger in manaschi. Plinavant enconuschia el la situaziun linguistica, sociala e politica en il Grischun ed en Svizra.
Enconuschientschas profundas dal moviment rumantsch
Martin Gabriel è stà dal 1991 enfin il 1997 en la suprastanza da la Renania. El è era s'engaschà per la cumissiun «Fatscha da nos vitgs» e per l'Uniun da giuventetgna da la Renania. Ils ultims onns ha Gabriel occupà plirs uffizis accessorics per la lingua, la cultura e la scola.
Dapi l'onn 2014 è Gabriel president da la Fundaziun Agentura da Novitads Rumantscha ANR. Gabriel vegn era ad esser enconuschent a blers pervi da ses engaschi tar RTR. Durant 18 onns ha el lavurà per differentas redacziuns e sco correspundent en Surselva. Il post sco secretari general da la Lia Rumantscha saja il punct culminant da sia lavur en favur dal rumantsch, uschia Martin Gabriel.
Dus umens vegls a la testa - nagin problem
Tant il president da la Lia Rumantscha, Johannes Flury, sco er il nov elegì secretari general na vesan nagin problem ch'i dettia uss «dus umens vegls» a la testa da la Lia Rumantscha. Martin Gabriel (55) è dal maini che ses pensar e sias ideas sajan restadas giuvnas. El na sneghia dentant betg ch'i saja probabel la davosa midada professiunala ch'el fetschia.
Cuntinuar cun bajegiar punts
Martin Gabriel vul cuntinuar la via instradada sut Urs Cadruvi. El veglia bajegiar vinavant punts entaifer la Rumantschia – saja quai lura tranter il territori da tschep e la diaspora ubain tranter la Lia Rumantscha e las differentas gruppas d'interess. Las finamiras concretas stoppia el però pir anc elavurar ensemen cun la suprastanza. Sch'el possia laschar enavos suenter sia perioda d'uffizi ina Lia Rumantscha uschè stabila sco ses antecessur ed unir anc pli ferms lioms ed unitad entaifer la Rumatnschia, saja el cuntent, uschia Martin Gabriel.
Ils ultims secretaris da la Lia Rumantscha
RR novitads 18:00
