En ses pled d'avertura per la sessiun d'avrigl dal Cussegl grond ha il president Vitus Dermont tematisà l'integraziun. La politica haja l’incumbensa da stgaffir las cundiziuns da basa per che l’integraziun funcziunia. Saja quai per persunas sin la fugia, persunas che vegnan en il Grischun a lavurar u per giudair la pensiun. Plinavant ha Dermont ditg che l’integraziun saja dentant era in tema aifer il Grischun, per exempel tranter Rumantschs, Talians e Tudestgs.
Extracts ord dal pled d'avertura da Vitus Dermont
«Quant amiaivel è il Grischun envers ils umans?»
Cun quests pleds ha Vitus Dermont cumenzà ses pled d'avertura. Ins pudess baingea pensar ch'il Grischun sco sistem statal na possia avair nagins sentiments umans, in sistem statal saja però bler dapli che mo ses territori e sia suveranitad territoriala.
La qualitad d'in stadi sa mussa tenor Dermont dentant er en la qualitad da quella lavur che vegnia pratitgada da la legislativa, executiva e specificamain da la giudicativa. Quai saja lavur umana. Perquai saja la dumonda quant amiaivel ch'il Grischun è envers ils umans, ina dumonda politica.
Ina dumonda che premettia dals politichers e da las politicras dad avair la voluntad dad adina avair en egl il bainstar dals umans. Sco exempel ha el lura menziunà ils differents aspects da l'integraziun, dals fugitivs, sur l'economia fin tar l'integraziun interna culturala e linguistica.
RR novitads 15:00/18:00