-
Bild 1 von 5Legenda: La posta veglia manca ad ils da Cuira. RTR, Fabia Caduff -
Bild 2 von 5Legenda: La posta ed il postomat èn dapli ils 5 da november ord funcziun. RTR, Fabia Caduff
-
Bild 3 von 5Legenda: Dentant arrivan anc blers clients, che stattan lura avant las portas serradas. RTR, Fabia Caduff
-
Bild 4 von 5Legenda: Qua sa chatta lura l'avis sin la proxima posta en ils conturns. RTR, Fabia Caduff
-
Bild 5 von 5Legenda: Il medem vala per il postomat. RTR, Fabia Caduff
Era sche la posta è serrada dapi ils 5 da november è ella anc frequentada bain. Mintga pèr minutas arriva in u l'auter cun brevs u pachets – e stat tut stut davant portas serradas. Er il postomat è ord funcziun.
Las reclamaziuns arrivan, ma betg tar la posta
La posta haja communitgà memia pauc bain ch'ella serra gia il november, rinfatschan ils clients. La posta sez piglia encunter l’infurmaziun ed emprova da meglierar sia communicaziun per in'autra giada.
Ina meglra communicaziun avess er Ivan Stäheli beneventà. Ses affar è en il medem edifizi sco l’anteriura posta. Di per di arriva la glieud vilada cun lur reclamaziuns tar el en biro.
Jau ma vegn avant sco in post d’infurmaziun da la posta. Mintga di vegnan silmain 20 persunas vilentadas en mes affar che tschertgan la posta e blastemman.
Per calmar e declerar a tantas persunas pertge che la posta n'è betg pli qua perda Ivan Stäheli adina puspè temp da lavur.
La posta sezza dentant na bada betg bler da quai. Els n'hajan betg survegnì ina massa reclamaziuns, di il pledader da medias da la posta Markus Werner. Dentant displaschi ad el, che Ivan Stäheli survegn tantas reclamaziuns.
Igl è da s’endisar
Actualmain è la posta serrada pir intgins dis e la glieud n'è anc betg disada al midament. Entant èsi anc in ir e vegnir davant la posta.
Sche tut va sco planisà avran las portas da la posta puspè. Lura dentant vegnan ils pachets substituids cun cudeschs. Planisà è che la biblioteca da la citad da Cuira va en l’edifizi vegl da la posta.
RR actualitad 11:00