Sco gia ils davos onns ha il chantun era nudà l'onn passà in gudogn, malgrà ch'el aveva quintà en il preventiv cun in minus. Concret munta quai, ch'il chantun ha fatg in gudogn operativ dad 84,3 milliuns francs, budgetà aveva el in deficit da 49,6 milliuns francs.
Nossas expensas totalas importan var 3 milliardas – Las divergenzas tranter budget e quint èn alura paucs pertschient, i n'è pia betg uschia ch'i fiss dal tuttafatg inexact.
Damain expensas e dapli entradas
Per quest resultat positiv datti tenor il chantun differentas raschuns. Per l'ina è vegnì dà ora pli pauc che budgetà; per exempel tar ils custs da persunal, là ha il chantun impundì 448 milliuns francs, quai èn 13,5 milliuns pli pauc che quintà.
Da l'autra vart hai dà dapli entradas che spetgà, per exempel tar las entradas da taglia; là aveva il chantun quintà cun 937,3 milliuns francs entradas, effectiv èn vegnids en 987,7 milliuns francs.
Vista en il futur
Per l'onn 2025 saja bain era da quintar cun in resultat positiv, dentant cleramain sut il nivel dals davos onns. I vegnia a dar pli paucas entradas.
Per l'ina saja il pe da taglia per persunas natiralas vegnì sbassà per 5%, quai che saja da sentir per l'emprima giada il 2025 e muntia radund 30 milliuns damain entradas. Per l'autra saja era da quintar cun ina contribuziun pli bassa da la gulivaziun da ressursas da la Confederaziun (-11,6 milliuns).
Segiras èn gia las entradas da la Banca naziunala svizra da 56,8 milliuns francs.
La dividenda da la Banca chantunala per l'onn da fatschenta 2024 inclusiv l'indemnisaziun per la garanzia statala è cun 103,7 milliuns pli u main sin il nivel da l'onn avant.
Da vart da las expensas vegnian cunzunt las contribuziuns a terzs, ma er ils custs da material e da persunal a crescher. En il preventiv è calculà che las expensas totalas creschian per 5%.
