Fin ussa na vesan ins nagliur placats ni tatgaders dals gieus olimpics en il Grischun 2026. Er en l’internet na chatt’ins nagina pagina davart questa candidatura. I n’ha era anc betg dà occurrenzas d’infurmaziun. L’iniziant e directur da l’uniun d’economia grischuna, Jürg Michel, è conscient da quai. Era saja cler, ch’els stoppian uss agir spert, e quai fetschian els era. Quels dis hajan ins surdà l’incumbensa ad in’agentura che vegn a gidar da far la lavur da persvasiun, la campagna per la candidatura.
Anc nagin mister u miss olimpia
Plinavant dovri persunas che stattan davanttiers, che persvadan la populaziun e dattan pled e fatg, in pensum che Gian Gilli ha fatg la davosa giada. Questa giada n’è quai betg il cas, schebain che Gilli è sa gidà cun la gruppa da lavur. Questa giada vulan ins reparter la lavur da persvasiun sin plirs chaus. Ils nums n’èn anc betg enconuschents. Ma quai duain esser differentas persunas, davent da giuvens sportists enfin politichers e turistichers.