«GraubündenVIVA» vul focussar sin products regiunals e sias tradiziuns. Dal lieu da la producziun, la producziun sezza fin tar la vendita e las persunas cun lur istorgias che stattan davos ils products. Per realisar quai è vegnida fundada l'uniun «GraubündenVIVA». Part a l'uniun pon far tuts affars, hotels ed uniuns interessadas u singulas persunas. Entant quinta l'uniun 31 commembers.
-
Bild 1 von 7. A l'uniun GraubündenVIVA po far part mintgin che ha gust. Bildquelle: GraubündenVIVA.
-
Bild 2 von 7. Bieraria Tschlin. Dad affars sco la bieraria da Tschlin... Bildquelle: GraubündenVIVA.
-
Bild 3 von 7. Chascharia Andeer. ... ina chascharia... Bildquelle: GraubündenVIVA.
-
Bild 4 von 7. Mascarpin, Isola. ...products da chauras fatgs da Vreni Cadurisch... Bildquelle: GraubündenVIVA.
-
Bild 5 von 7. Las Sorts, Filisur. ...purs da tartuffels sco Sabine e Marcel Heinrich... Bildquelle: GraubündenVIVA.
-
Bild 6 von 7. Destillaria Candinas, Surrein. ...fin a destillarias... Bildquelle: GraubündenVIVA.
-
Bild 7 von 7. Bain da viticultura «zur Sonne», Jenins. ...e viticulturs sco Francisca e Christian Obrecht. Bildquelle: GraubündenVIVA.
Anc bleras dumondas avertas
L’idea è uss sin maisa. Dentant bler dapli che mo in'idea n'è il project anc betg. Fitg blers detagls tar il project mancan anc. Per exempel prevesa il project da parter il Grischun en 5 differentas regiuns turisticas e tematicas. Mintga regiun duai survegnir ses agen accent culinaric. Cun quai duai il giast avair in motiv da visitar differentas regiuns en il Grischun. Però quai che tuna bain sin palpiri n'è anc betg concret. Sco che quella differenziaziun vegn propi a vesair ora na po «GraubündenVIVA» anc betg dir. Il project è per il mument en la prefasa. In emprim pass è dentant fatg cun fundar l’uniun.
Privat-Public-Partnership
La finanziaziun dal project duai succeder cun in uschenumnà privat-public-partnership. Ina part dals raps duai vegnir da l’economia e l’autra part dal maun public. Il chantun Grischun è pront da sustegnair il project en la prefasa cun 550'000 francs.
Turistichers e producents beneventeschan «GraubündenVIVA»
Il resun dals turistichers è fitg positiva, era sche blers detagls mancan anc. Saja quai da la hotelleriesuisse Grischun fin tar la gruppa d’interess per il turissem, las singulas destinaziuns u Grischun Vacanzas ch'è sez in commember da l’uniun.
Ils producents che fan gia part a l’uniun èn intgantads dal project. Per els èsi oravant tut era in'occasiun per far reclama. Dentant tge che als spetga propi sto per gronda part anc sa mussar.
RR actualitad mezdi 11:00