Curt e concis:
- La fusiun va en vigur il prim da schaner 2019.
- La psichiatria per uffants e giuvenils daventa in'atgna unitad dal PDGR.
- Ils PDGR surpiglian tut ils collavuraturs.
Aifer ils servetschs psichiatrics dal Grischun (PDGR) datti ina nova unitad autonoma per la psichiatria d'uffants e giuvenils. Quella vegn manada da Heidi Eckrich (actualmain schefmedia dal KJP) e da Reto Mischol (actualmain schefpsicolog dal KJP). La psichiatria per uffants e giuvenils vegn separada organisatoricamain e localmain da la partiziun dals creschids.
«Nagin'acziun per spargnar custs»
Relaschadas na sajan betg planisadas, hai gì num oz cura ch'ils responsabels han infurmà davart la fusiun. Ils PDGR surpiglian ils circa 75 collavuraturs e las collavuraturas da la psichiatria per uffants e giuvenils.
La fusiun duai bain succeder a moda effizienta, adequata ed economica, ha ditg il president dal PDGR, Fadri Ramming. Il motiv da la fusiun na saja dentant insumma betg ina fusiun per motivs da spargnar. Ed era il president da la KJP, Rico Monsch, ha accentuà che la fundaziun n'haja nagins problems finanzials. Ella saja simplamain memia pitschna per dumagnar suletta las sfidas da l'avegnir e las grondas pretensiuns sin il sectur da sanadad. Tuttina dettia potenzial da nizzegiar sinergias, sco per exempel en l'administraziun, la contabilitad u l'informatica.
Project per ina nova staziun a Cuira cuntinuescha
En il Grischun datti adina dapli uffants e giuvenils cun problems psichics ed era perquai mancan ils plazs en instituziuns spezialisadas. Actualmain vegnan uffants e giuvenils plazzads en instituziuns en auters chantuns u sin staziuns per creschids.
La fundaziun KJP ha gia instradà in project per engrondir la Chasa da terapia Fürstenwald a Cuira cun ina staziun cun 14 letgs per uffants e giuvenils. Cun la fusiun surpiglian il servetschs psichiatrics dal Grischun (PDGR) la responsabladad per quest project. Il president Fadri Ramming vul analisar tut ils aspects giuridics e finanzials e decider aifer l'onn 2019 co proceder vinavant cun quest project.
In lung viadi enfin la fusiun
Gia dapi bunamain 10 onns datti pretensiuns che las duas instituziuns duain collavurar u fusiunar. En il Cussegl grond han politicras e politichers adina puspè rinforzà quai cun dumondas ed incumbensas a la regenza.
Perquai è il cusseglier guvernativ Christian Rathgeb immens cuntent ch'ils discurs han ussa purtà fritg e che la fusiun daventa realitad il cumenzament dal 2019. Era l'entira regenza haja approvà la fusiun.
RR novitads 15:00