Perquai ch'il vaccin manca actualmain, haja il plan da vaccinar retard. Da las 17'000 persunas ch'èn s'annunziadas per laschar vaccinar, hajan uschia passa 11'500 anc insumma nagin termin. A persunas che hajan gì in termin fix, hajan ins stuì stritgar e spustar quel.
Gia vaccinadas encunter il coronavirus sajan fin uss bunamain 10'000 persunas en il Grischun. La gronda part, radund 73%, ha passa 60 onns u appartegnan a la gruppa da risico da persunas cun malsognas cronicas.
En pli accentuescha l'uffizi da sanadad chantunal ch'il program da vaccinar en las chasas da tgira e d'attempads saja bunamain terminà.
Problem cun il sistem d'annunzia da la Confederaziun
Raschun per l'entir retard è il sistem d'annunzia dal BAG. Durant ils emprims dis hai dà problems cun parter tiers ils termin, uschia ch'i n'haja betg funcziunà da dar ils termins tenor la successiun sco las annunzias sajan vegnidas en. Il chantun deploreschia quai, ma n'haja sez nagina influenza sin il sistem. Ma la Confederaziun saja vid schliar il problem.