La campagna cun il num «il Grischun – il chantun da velos» vegn realisada da l'uniun Pro Velo Grischun ed implementada en il rom dal project chantunal Graubünden Bike che dat il rom organisatoric e finanzial a l'entira promoziun dal traffic da velo en il chantun Grischun. Graubünden Bike accumpogna il project cun expertisa e sustegna la coordinaziun cun autras activitats en il champ dal traffic plaun. La campagna vegn er sustegnida da la Viafier retica e da la secziun grischuna dal Club da traffic svizzer.
Sin la pagina web da la campagna decleran ils responsabels ch'i saja uras ch'il velo vegnia considerà en il Grischun sco ina pitga centrala dal sistem da traffic. Il velo saja il med da transport il pli favuraivel al clima ed il pli saun.
Grazia als e-bikes n'èn era vias stippas nagin problem pli e la tipografia na duai betg valair sco stgisa.
Appels al chantun , interpresas e scolas
Per cuntanscher questa finamira dumonda la campagna tranter auter da la regenza d'implementar las parts davart il traffic public e plaun da ses program 2021-2024 e metter a disposiziun infrastructura da velos nuninterrutta e segira. Tar l'infrastructura vai per vias da velo, signalisaziun ed er parcadis da velo.
En pli appelleschan las iniziantas ed ils iniziants da la campagna er ad interpresas e scolas d'integrar il velo en lur program da promoziun e da tematisar quest tema regularmain.
