Las cameras che Hans Danuser (*1953) dovra ozendi per sia lavur d’artist èn anc adina quellas cun las qualas ch'el ha cumenzà sia carriera. Uschia che sias cameras dateschan anc dals onns 1970 ed èn passa 40 onns veglias.
Midar quellas na vul el betg: «Igl è uschia che quellas cameras èn daventadas mias cameras preferidas, sco insatge ch’ins porta cun sai, ch’ins survegn gugent cun ils onns.»
IN VIVO ha purtà il success
Internaziunalmain enconuschent è Hans Danuser vegnì cun ses ciclus da fotografias IN VIVO, nua ch’el è s’occupà durant diesch onns (1980-1989), en set serias, da las zonas da tabu da nossa societad. Las 93 fotografias nair-alvas dattan in'invista en lieus betg accessibels u en secturs da la vita pauc enconuschents: Uschia per exempel en ovras atomaras, la medischina, la fisica u er la chemia.
«IN VIVO» è vegnì ludà internaziunalmain sco in'impurtanta contribuziun tar la fotografia contemporana ed ha creà la basa per numerusas collavuraziuns e projects interdisciplinars.
-
Bild 1 von 7Legenda: Hans Danuser, in dals piuniers da la fotografia moderna en Svizra, expona en il museum d'art a Cuira. RTR, Gion Caviezel -
Bild 2 von 7Legenda: L’exposiziun en il museum d’art a Cuira collia las differentas ovras da Hans Danuser dals ultims 35 onns. RTR, Gion Caviezel
-
Bild 3 von 7Legenda: Il directur dal museum d’art Grischun, Stephan Kunz declera l’impurtanza da las fotografias dal ciclus “IN VIVO” (1980-1989) RTR, Gion Caviezel
-
Bild 4 von 7Legenda: Extracts or da las fotografias dal ciclus “IN VIVO” (1980-1989). RTR, Gion Caviezel
-
Bild 5 von 7Legenda: Fotografias dal ciclus “EROSION” (2000-2006) davanttiers per terra. Davostiers fotografias or da la seria “STRANGLED BODY” (1995) RTR, Gion Caviezel
-
Bild 6 von 7Legenda: Fotografias dal ciclus “EROSION” (2000-2006) exponidas per terra. RTR, Gion Caviezel
-
Bild 7 von 7Legenda: Fotografias dal ciclus “PARTY IS OVER” (1984-2016). RTR, Gion Caviezel
Cuntent d'esser a Cuira
In extract da quest ciclus IN VIVO è era da vesair en l’exposiziun «Chombras stgiras da la fotografia» en il Museum d’art dal Grischun. En pli mussa l’exposiziun dentant era extracts or dad autras serias e ciclus sco per exempel PARTY IS OVER (1984-2016), EROSION (2000-2006) u er FROZEN EMBRYO SERIES (1997-2000).
Uschia che «Chombras stgiras da la fotografia» è l’emprima exposiziun che dat ina survista da l’ovra fotografica da Hans Danuser dals ultims 35 onns.
Hans Danuser è en mintga cas cuntent ch’el dastga exponer en il Museum d’art dal Grischun a Cuira. Betg be perquai che Cuira è ses lieu d’origin, mabain cunzunt perquai ch’il nov bajetg dal museum d’art porschi il plaz adattà per fotografias ch’el n’ha fin ussa betg pudì exponer en il Grischun.
RR actualitad 17:10