El saja betg stà surstà cura ch'el haja udì che Vitus Huonder restia per il mument vinavant uvestg da Cuira. Malgrà ch'el haja anc il titel d'uvestg da Cuira saja quella schliaziun da cumparegliar cun quella ch'ins aveva gia cun l'antecessur da Huonder Amedée Grab. Lez aveva suenter ses 77avel anniversari manà vinavant l'uvestgieu da Cuira sco administratur apostolic.
Il pensum da Vitus Huonder è uss en sasez il medem sco quel d'in administratur apostolic.
Pius Venzin è in dals 24 canonis che furman il chapitel catedral e po cundecider tgi che succeda a l'uvestg Vitus Huonder. Da Roma retschaiva lur gremi la glista cun trais candidats pussaivels per il post. Cura ch'els survegnian questa glista na sappia el er betg. I haja num spetgar, ma la glista quella saja probabel schon a Roma – ma il papa ensemen cun cardinals ed uvestg n'haja probabel betg anc fatg la selecziun.
Quai po anc cuzzar emnas u mais. Roma n'ha per il solit nagina prescha.
Ma cura ch'i saja uschè lunsch vegnian ils 24 canonis ensemen e lura giaja quai relativamain svelt ed ins haja ina decisiun. Ma anc hai num: pazienza.
RR actualitad 17:00