Adrian Arquint è responsabel per bun 70 collavuraturAs, repartids en la centrala a Cuira, en ils 12 districts da chatscha e set da pestga. L'Uffizi è tranter auter responsabel per realisar la politica federala e chantunala da chatscha e pestga. Autras incumbensas èn: la protecziun d'animals periclitads ed il management d'animals da rapina gronds.
Adrian Arquint è creschì si a Scuol ed ha studegià medischina veterinaria a l'Universitad da Turitg, nua ch'el ha era doctorà. Tranter ils onns 2002 e 2009 è el stà veterinari d'assistenza per animals pitschens e gronds.
Dapi il 2009 lavura el per il chantun Grischun, nua ch'el ha surpiglià la direcziun da l'inspecturat da la producziun primara tar l'Uffizi per la segirezza da victualias e per la sanadad dals animals en l'agricultura.
Adrian Arquint ch'ha 45 onns cumenza sia nova plazza il prim da favrer 2018. Georg Brosi, il manader actual da l'Uffizi da chatscha e pestga va en pensiun la fin schaner 2018. Quai suenter esser stà 17 onns a la testa da l'uffizi.
