Ussa èsi cler: 67 vischnancas grischunas ston reducir lur zonas da bajegiar. I sa tracta surtut da vischnancas en regiuns perifericas e turisticas. 29 vischnancas percunter dastgan engrondir lur zonas da bajegiar – surtut vischnancas en la Vallada dal Rain. Decisiv per la calculaziun èn las prognosas da populaziun da l'Uffizi federal da statistica.
Pensum difficil per vischnancas
Las vischnancas ston uss analisar la situaziun e reveder lur planisaziun locala e quai entaifer tschintg onns. La regenza grischuna saja dentant conscienta che quai è in pensum difficil, hai num en la communicaziun. Ella empermetta perquai d'accumpagnar cun mesira las planisaziuns localas e da pigliar resguard sin la situaziun da mintga vischnanca. Ina pitschna reserva da zonas da bajegiar duain era quellas vischnancas pudair mantegnair – che ston reducir lur zonas da bajegiar.
Cumpensaziun per quels che perdan
Possessurs da zonas da bajegiar che perdan daners entras ina midada da zona duain survegnir ina cumpensaziun. Persuenter ston possessurs che gudognan entras ina midada da zona, pajar ina taxa. Quant gronda che quella vegn ad esser, decida il Cussegl grond cura ch’el tracta la lescha da planisaziun – probabel en la sessiun d'october.
Bajegiar pli concentrà
En l'entira Svizra duai vegnir bajegià pli concentrà. Quai pretenda la lescha federala davart la planisaziun dal territori. Ils chantuns han temp enfin il matg 2019 d'adattar lur plans directivs.
RR novitads 11:00