Dapi la bova dal Piz Cengalo in Val Bondasca è la chamona Sciora dal CAS serrada e la senda per quella chamona destruida. La primavaira dal 2023 ha la suprastanza communala da Bregaglia dà glisch verda per ina nova senda. La fin da matg han las lavurs per quella nova senda cumenzà.
Quatter punts pendentas ed ina nova senda, battida en la costa aut sur la val duessan pussibilitar l’access tar la chamona Sciora. Las lavurs per quella senda èn spezialas – dapi duas emnas èn trais lavurers londervi a fabritgar. L’emprim ston els far ils fundaments per las punts. La lavur en suga è pretensiusa e dovra concentraziun.
La senda nova custa radund 1,15 milliuns francs. Quel import vegn repartì suandantamain:
- 400’000.- donaziuns
- 200’000.- vischnanca Bregaglia
- 200'000.- CAS Hoher Rohn
- 150’000.- Uffizi da construcziun bassa «traffic plaun»
- 100’000.- Uniun Centrala CAS
- Circa 100’000.- lavur cumina
La nova senda duess gidar a reanimar e pussibilitar in meglier avegnir a la chamona dal CAS Sciora, ch'appartegna a la secziun Hoher Rohn.
Sche tut va bain, lura pon ins terminar las lavurs dals fundaments anc quest onn il november. Uschia pudessan las punts pendentas – ch'èn tranter 35 e 70 meters lunghezza – vegnir montadas la primavaira dal 2025.
