En la gronda sala dal center da senioras e seniors «Riga Haus» a Cuira èn sa rimnadas radund 30 persunas. Sch'ins guarda en la runda, dat en egl che la gronda part da las preschentas e preschents han chavels grischs u alvs. Tranteren hai dentant er intginas fatschas fitg giuvnas. Igl èn studentas e students da la Scol'auta spezialisada da la Svizra Orientala a Son Gagl.
Kristina Paskov da Vaz Sot è ina dad ellas. Ella e sias collegas avevan survegnì l'incumbensa dal «Riga Haus», la «Crusch Cotschna Grischun» e l'«Associaziun Alzheimer Grischun» d'eruir il basegns e la prontadad per ina «Caring Community» e sch'ins po etablir ina tala en la citad da Cuira.
Ina «Caring Community» è ina cuminanza u pliras cuminanzas en ils quartiers nua ch'ins guarda e gida l'in l'autra. U anc pli concret:
Sch'insatgi na vuless per exempel suenter la perdita d'in partenari u d'ina partenaria betg pli ir suletta a kino u al teater, savess ins chattar or entras ina «caring community» che dus blocs pli envi è insatgi en la medema situaziun ed ins avess uschia la pussaivladad da sa chattar.
Las studentas e students èn qua per preschentar ils resultats da lur retschertga, ch'ellas avevan fatg la stad, en furma da discussiun averta e questiunaris en ils quartiers enturn il «Riga Haus»: Il basegn e la prontadad per ina «Caring Community» para d'esser qua, conferma la studenta Kristina Paskov.
I tuna fitg positiv. La glieud è tendenzialmain pronta. Ma ins senta er ch'i dovra ina fitg buna organisaziun sin plirs nivels. Betg mo l'individual mabain er auters secturs stuessan collavurar.
Plinavant fissi impurtant tenor la dunna che studegia «lavur sociala» a Son Gagl, da savair integrar persunas pli giuvnas ch'èn prontas da s'engaschar. Uschia pudess profitar l'entira societad.
Ina da quellas ch'è vegnida per tadlar tge che las studentas e students han elavurà è Judith Durisch-Vieli. Ella abitescha dapi trais onns, ensemen cun ses um, en la nova part dal «Riga Parc». Els hajan midà chasa perquai ch'i n'aveva nagin ascensur là nua ch'els abitavan avant. Ses um haja la malsogna da Parkinson. Perquai haja duvrà quella midada. Strusch in mez onn pli tard haja Judith Durisch-Vieli survegnì difficultads cun ils egls. Ella na saja perquai betg pli stada uschè mobila e n'haja betg pli pudì ir cun auto.
Anc fetschia ella però tant sco pussaivel sezza. Sch'ella haja il basegns d'in servetsch specific possia ella guardar suenter quai en l'internet. Ma quai na saja betg per tuttas uschè simpel sco per ella, manegia ella. Persunas che n'hajan betg la forza, che na san betg nua tschertgar, che pon betg pli u ch'han nagin internet sajan alura pulit persas. E quellas e quels hajan era ina legitimaziun.
Nus avain fatg canortas per uffants. Ma las canortas per senioras e seniors n'avain nus anc betg.
Judith Durisch-Vieli spera surtut fitg concret ch'i vegnia instradà sin basa dals resultats, in post da consultaziun nua ch'ins sa s'annunziar per telefon sch'ins dovra ina infurmaziun. Quai fiss ina da las mesiras che las studentas e students proponan. Differentas purschidas adattadas per senioras e seniors dettia numnadamain gia, dentant èn ellas pauc enconuschentas u accessiblas a quella gruppa, che n'è betg uschè versada cun retschertgas en l'internet.
Ina da quellas offertas ch'è gia avant maun saja per exempel «l'incontro», declera Sandro Ursch. Quai saja ina coaliziun da senioras e seniors che s'inscuntrian ina enfin duas giadas l'emna per «café e turta», per in suentermezdi da gieus, per referats u autras activitads. E quai dettia a las persunas che fan regularmain diever da quella purschida la segirtad ch'els sajan en bun mauns en ina cuminanza.
Sco proxim vuless ins analisar tut ils resultats che las studentas ed ils students han elavurà. E silsuenter fissi la finamira da lantschar ensemen cun la citad da Cuira in project per eruir nua ch'i pudess sa sviluppar insatge. Cun resultats concrets possian ins dentant pir quintar en il decurs da l'onn proxim.
